Pakult përplaset me klubin për kroatin Zderiç
Kukësi/ Austriaku nuk është dakord me klubin
Kukësi vijon të jetë në merkato dhe drejtuesit po ecin me ritme të larta sa u takon afrimeve të reja, por dhe largimeve. Zyrtarisht pjesë e Kukësit të sezonit të ri janë bërë portieri Maloku, Arlind Kalaja dhe Edis Maliqi. Gjithashtu është arritur marrëveshja me Harallamb Qaqin. Ndërsa largime zyrtare janë Amido Balde e Eni Imami. Por, "Panorama Sport", ashtu siç ka raportuar pak ditë më parë planin e fshehtë të drejtuesve, ai po vihet në jetë. Presidenti Gjici ka ndryshuar strategji, duke i kërkuar drejtorit Nexhipi që të afrojë futbollistë cilësorë, të cilët mund të shpërthejnë te nënkampionët e më pas të shiten në tregun e huaj njëlloj si Guri.
Plani i fshehtë - Drejtuesit kërkojnë që të arnojnë krahun e djathtë të mbrojtjes te Kukësi, e kjo ndodh duke larguar Filip Zderiçin dhe Bujar Idrizin, të cilët kanë bërë një sezon të mirë te verilindorët. Por, kjo nuk ka mjaftuar për drejtuesit, pasi kërkonin rendiment më të lartë nga të dy mbrojtësit, duke marrë në konsideratë rrogat e tyre mujore, Zderiç së bashku me bonuse kalon 3500 euro, ndërsa Idrizi 2000 mijë euro.
Kështu që duke parë performancën e tyre dhe pagën e lartë, drejtuesit kanë plan që t'i largojnë të dy mbrojtësit e t'i zëvendësojnë ata me lojtarë që të mos i kushtojnë shumë buxhetit të klubit. Nga burime të sigurta në klub të dy mbrojtësit Zderic e Idrizi nuk do të grumbullohen
për fazën përgatitore në Slloveni, gjë që do të thotë se ata janë të larguar nga Kukësi. Për Idrizin nuk është dërguar dokumentacioni, për t'u pajisur me vizë për fazën përgatitore në Slloveni. Një gjë e tillë nuk është e nevojshme për Zderiç, që ka pasaportë gjermane.
Trajneri - Sot mbërrin në Tiranë trajneri Peter Pakult. Austriaku ka mbaruar pushimet e kthehet në Tiranë, ku do nisë nga puna për përfaqësimin në Kupat e Europës. Me mbërritjen e Pakult pritet një mbledhje me drejtuesit e presidentin Gjici në lidhje me ecurinë e merkatos.
Gazeta mëson se tekniku Pakult është i pakënaqur me largimin e Zderiç, i cili iu ka komunikuar drejtuesve se nëse ata do sjellin futbollistë më cilësorë, atëherë mund të largojnë këdo në klub, por së pari të gjejnë e të sjellin futbollistë më të zotë. Tekniku se ka përtypur dot
sjelljen përkundrejt Zderiç, i cili ka ardhur në klub me sugjerimin e drejtpërdrejtë të tij. Ai nuk është pyetur dhe me shumë gjasa do të vërë veton. Ndërsa për klubin rroga është problem, por gjithsesi do të shihet se si do të shkojë situata me ndërhyrjen e trajnerit. Skerdilaid Sulozeqi