UEFA nuk e fal Jashanicën, klubi korçar: Do të ankimojmë në KAS
Dopingu, lihet në fuqi pezullimi 2-vjeçar për qendërmbrojtësin
Nuk ka falje për Bajram Jashanicën, i cili do të mbetet i pezulluar të marrë pjesë në futbollin profesionist deri në shkurt të 2020-ës. Mbrojtësi i Kosovës dhe Skënderbeut ka rezultuar pozitiv në testin antidoping pas ndeshjes kundër Jang Bojs në Europa Ligë. Sigurisht që për të është marrë një dënim nga UEFA. Dhoma e Apelit në UEFA ka qenë e pamëshirshme me Jashanicën që nuk e ka ulur dënimin fillestar, me 2 vite pezullim nga çdo aktivitet. Kështu, ai do të mbetet i skualifikuar deri në vitin 2020. Jashanica u dënua më parë me 2 vite pezullim në muajin mars, por më pas çështja
shkoi në Apel për një ulje të dënimit, por, me sa duket, UEFA nuk është tërhequr aspak për përdorim të substancave të ndaluara. Menjëherë pas publikimit të lajmit se Komisioni i Apelit e ka lënë në fuqi dënimin për Bajram Jashanicën, ka reaguar edhe klubi i Skënderbeut. Korçarët njoftojnë se Apeli i
UEFA- s ka lënë në fuqi këtë dënim, pavarësisht argumenteve për uljen e sanksionit, ndërsa bëjnë me dije se kjo çështje do të shkojë në KAS. Më poshtë, edhe reagimi i plotë: "Komisioni i Apelit i UEFA-s vendosi lënien në fuqi të masës disiplinore 'pezullim nga aktiviteti' për një periudhë 2-vjeçare për
lojtarin e KF Skënderbeut, Bajram Jashanica. Pavarësisht argumenteve dhe dëshmive të dhëna në seancën gjyqësorë nga ana e lojtarit dhe personave të tjerë të lidhur me çështjen, organi juridik vendosi mospranimin e kërkesës së paraqitur nga Bajram Jashanica për uljen e sanksionit. Bëjmë me dije se, aktualisht palët janë në pritje për disponimin nga ana e Komisionit të Apelit të UEFA- s të vendimit integral, i cili do të ankimohet në KAS. KF Skënderbeu i ka ofruar lojtarit të gjithë mbështetjen e mundshme gjatë kësaj periudhe të vështirë për të dhe beson se masa disiplinore është disproporcionale me rrethanat e ngjarjes dhe me shkallën e përgjegjësisë të Bajram Jashanicës. Për këtë arsye, në çdo formë dhe me të gjitha mjetet në dispozicion, do të kërkojmë vendosjen e një mase disiplinore më të ulët për garantimin e vijueshmërisë së karrierës të lojtarit tonë".