Uzuni: Të ardhmen time e vendos presidenti Laska
Myrto Uzuni ka qenë një nga elementët më të rëndësishëm të ekipit kurbinas, teksa sezoni i fundit konfirmoi edhe një herë se beratasi ka shumë kualitet. Në një bisedë për "SuperSport", sulmuesi i krahut foli për nisjen e përgatitjeve dhe zërat e merkatos. Shumë klube brenda dhe jashtë vendit janë të interesuar për shërbimet e Uzunit, por Laçi ka investuar për lojtarin dhe pret që të përfitojë një shifër të majme nga transferimi i tij. "Kemi bërë një vit shumë të suksesshëm. Mendoj që jo vetëm unë, por i gjithë grupi ka bërë që të jemi këtu ku gjendemi sot", u shpreh fillimisht beratasi. Më pas, ai foli për ndryshimet në pankinë. "Përderisa e kanë zgjedhur drejtuesit, besoj se do të jetë i duhuri. Urojmë të jemi sa më lart dhe shpresoj që së bashku t'ia dalim", theksoi beratasi i talentuar. Në lidhje më një transferim të mundshëm, Uzuni dribloi, duke ia lënë gjithçka në dorë kreut të klubit. "Me këtë pjesë merret presidenti, i cili ka investuar shumë për mua. Vendos ai çfarë do të bëhet", përfundoi Uzuni, për të cilin ka interesim konkret nga klube greke, kroate dhe turke. Gjithsesi, aktivizimi në Ligën e Europës shihet si një trampolinë për lojtarin me numrin 10 mbi shpinë. Paraqitja e mirë në ndeshjet ndërkombëtare do të rrisë edhe më shumë vlerën e Uzunit. Në të kaluarën ai ka qenë pjesë e Kombëtareve të moshave të Shqipërisë, ndërsa ky është sezoni i parë në Superiore që e mbyll me 10 gola të shënuar.
SKUADRA - Laçi vijon përgatitjet nën drejtimin e Besnik Prengës. Pas afrimit të mesfushorit kroat, Nikola Eller, pritet që kurbinasit të përforcohen me të tjerë lojtarë në ditët në vijim. Laçi ka marrë në formë huazimi nga Tirana edhe mbrojtësin e majtë, Erjon Hoxhallari. Me skuadrën po stërvitet edhe mesfushori shkodran, Ndriçim Shtubina, për të cilin u fol se do të largohej drejt Kosovës te Trepça '89.