Saul: Në skuadër mbizotëron atmosferë fituese
Lojtari i Atletikos së Madridit, Saul, ka dhënë ditën e djeshme një deklaratë të gjatë për të përditshmen spanjolle "AS", në prag të Botërorit rus. Mesfushori i bardhekuqve mendon se në skuadër është një frymë fituese dhe kjo është pozitive për paraqitjen e përfaqësueses së tij. Si e shoh ndeshjen e parë ndaj Portugalisë? Ne e dimë që ata janë kampionët e Europës. Është një skuadër e fortë dhe do të na e bëjnë të vështirë. E dimë që fitorja në start të hapë shumë dyer. Edhe pse në 2010 humbëm në ndeshjen hapëse. Gjendja e skuadrës? Jemi përgatitur mirë gjatë kësaj kohe. Të gjithë lojtarët janë të fokusuar dhe nga atmosfera në dhomat e zhveshjes, kupton që mbizotëron një klimë fituese. Favoritë? Kupa e Botës është e vështirë, ka shumë skuadra të forta: Brazili, Gjermania, Franca dhe ne. Po t'i bëjmë gjërat mirë, do të jemi të vështirë për t'u mundur. Kë nuk do të doja në finale? Nëse shkon në finale, nuk ka rëndësi se kë ke kundërshtar, do të fitosh.
TAKTIKA - Saul është ndalur më pas në një analizë të shkurtër për taktikën dhe mënyrën e lojës së "Furive të Kuqe": "Më mirë me një sulmues apo me dy? Nëse ke kaq shumë lojtarë të mirë përreth, atëherë nuk të intereson se kush luan, nëse luan sipas një plani taktik të mirëorganizuar. Është e rëndësishme që pas një momenti të keq, të vazhdosh të krijosh presion dhe të fitosh përsëri topin. Diego Kosta? Ndihet shumë mirë. Është shumë i lidhur me shokët e skuadrës dhe e shoh të emocionuar. Kjo është shumë e rëndësishme për ne".