Gjermania kampione, turpëron Brazilin dhe vret ëndrrën e Mesit
"Pancerat" i falen Gëces në finalen kundër Argjentinës Botërori 2014 ishte dështimi i Italisë dhe i Spanjës
Botërori 2014 ishte një rikthim në të kalu arën për "Seleçaon" që organizonte dhe kishte shumë shpresa për të shlyer nga memoria "Marakanazon" e famshëm të vitit 1950, ku Uruguai dërgoi në lot e vetëvrasje një komb të tërë. Por nga "Marakanazo", të zotët e shtëpisë vuajtën "Mineirazon", një turpërim shumë të madh, pasi Gjermania jo vetëm i shkatërron me rezultatin 7-1 në gjysmëfinale, por në të njëjtën kohë dërgon në depresion edhe Argjentinën, e cila në finale është aq e trembur, sa Higuain dhe Mesi vetëm shpërdorojnë, derisa "pancerat" t'i falën një goli të Mario Gëces, në minutën 113-të dhe të ngrijnë në qiell, duke meritua të katërtën Kupë Bote të historisë së tyre. Në Brazil ishte Botërori i problematikeve, por edhe i surprizave të mëdha dhe i turpërimeve të shumta për disa nga pretendentet. DËSHTIM ITALO-SPANJOLL
Ata që ishin të detyruar të ngrinin kokë në evenimentin brazilian ishin italianët, të cilët pas dështimit në Kupën e Botës 2010, të organizuar në Afrikën e Jugut dhe që në Europianin e vitit 2012 kishin treguar forcë, por më pas u shkatërruan në finale 4-0 nga Spanja, duken të trembur kur dëgjojnë fjalën "Botëror". Të vendosur në Grupin D, starti i "axurrëve" ishte drithërues, duke mundur Anglinë 2- 1, falë një goli të të "urryerit" Baloteli, pasi më parë Markizio dhe Starrixh i ishin përgjigjur njëri- tjetrit. Por tronditja e madhe do të vijë në ndeshjen e dytë, teksa kur Anglia mposhtej nga Uruguai dhe i jepte lamtumirën turneut, Italia dukej se ndaj Kosta Rikës
do të bënte thjesht formalitetin, por mundet 1-0. Në sfidën e tretë, Baloteli me shokë duhej të fitonin me çdo kusht ndaj Uruguait, por në fund përfundojnë të mposhtur 1-0, me 10 lojtarë (Markizio, i kuq në të 59- ën), ndërsa Kosta Rika barazon pa gola me Anglinë dhe firmos kualifikimin historik. Surprizë absolute ishte gjithashtu eliminimi i Spanjës që në fazën e grupeve. Kampionët në fuqi të Europës u shkatërruan në ndeshjen hapëse 5- 1 nga Holanda (e mbylli grupin me pikë të plota), ndërsa u mundën edhe nga Kili. Suksesi
i fundit 3-0 ndaj Australisë ishte thjesht për statistikë. Ndërkohë, në grupet e tjera surpriza nuk pati, pasi Brazili, Franca, Gjermania dhe Argjentina, por edhe Kolumbia e talenteve të shumta kaluan lehtësisht.
FAZA E 1/8- ave
Kjo ishte edhe faza më drithëruese e turneut, pasi të gjitha pretendetet rrezikuan eliminimin. Brazili u falet penalltive (fitoi 4-3) kundër Kilit, pas 120 minutat ishin mbyllur 1-1. Algjeria tmerron Gjermaninë, duke e mbajtur për 90 minuta nën presion, por në kohën shtesë, Shyrrle dhe Ozil i japin suksesin 2-1 dhe avancojnë. Edhe Argjentina lëkundet me Zvicrën e 5 shqiptarëve në grup, por Di Maria në shtesë i nderon. Holanda vuan gjithashtu, por arrin të përmbysë brenda kohës së rregullt me Shnajder e Huntelar disavantazhin e Xhovani Dos Santos. Belgjika kualifikohet duke mundur 21 SHBA-të, Kosta Rika vazhdoi të konfirmohet "hirushja" e turneut duke kaluar me penallti, ndërsa të vetmet që avancuan pa probleme ishin Franca dhe Kolumbia. ÇEREKFINALET
Kur gjërat nisën të bëheshin serioze, ato që vendosën ishin detajet dhe duelet ishin të hapura deri në fund. Gjermania tregoi muskujt, ku me cinizmin e tyre mposhtën 1-0 Francën me golin e Humels. Argjentina iu fal Higuainit ndaj Belgjikës për t'u kualifikuar falë rezultatit minimal. Holanda kalon më tej falë gjenialitetit të trajnerit Van Gal, i cili në minutën 120 ( deri atëherë ndeshje ishte 0-0) zëvendëson portierin Cillesen me mjeshtrin e pritjeve të penalltive, Krul, i cili ndal dy lojtarë të Kosta Rikës dhe kualifikon portokallinjtë. Ndërkohë, Brazili vendës vërtet fiton 2- 1 Kolumbinë, në një sfidë ku arbitri ndikoi ndjeshëm me disa vendime, por ata humbin për gjysmëfinalet Nejmarin për dëmtim dhe Tiago Silvën për kartonë. "MINEIRAZO"
Shorti vë përballë Brazilin me Gjermaninë, një duel që parashikohej si finalja e turneut, por 58 mijë të pranishmit në "Mineirazo" shohim makthe me sy, pasi skuadra e Joakim Lëvit është thjesht e pamëshirshme: 7- 1 për "pancerat" dhe lotët që vërshojnë lum në stadium dhe kudo, një turpërim i paprecedentë në histori për "Seleçaon". Ndërsa në sfidën tjetër gjysmëfinale, Argjentina kalon me penallti Holandën. Dhe sikur të mos mjaftonte "Mineirazo", edhe "tulipanët" i japin një tjetër leksion në finalen për vendin e tretë Brazilit, duke e mundur 3-0. MESI? JO... GËCE...
Finalja e "Marakanës", aty ku Brazili kërkonte të fshinte faqen më të errët të historisë, sheh protagonistë Argjentinën dhe Gjermaninë, me Higuainin që sheh t'i falet një gol nga Krosi, por përballë Nojerit gabon golin e jetës. Mesi gjithashtu gjatë lojës humbet raste pa fund të pastra, ndërsa gjermanët, të hekurt, presin madje deri në minutën e 113-të, kur me Gëcen e ardhur nga pankina dhe të harruar të vetëm në zonë shënojnë golin që kurorëzon ëndrrën e madhe të një kombi të tërë, por mbi të gjitha vret ato të Lionel Mesit për t'u shenjtëruar si "i pavdekshëm"...