Uruguai bën të qajë Salahun për... Bajram
Grupi A / Gimenez shënon në minutën e 90-të
Të gjithë prisnin Mohamed Salahun në aksion, por edhe një herë tjetër fotografia e fenomenit të Egjiptit ishte në lot. Pas dhimbjes për ndrydhjen e shpatullës në finalen e Ligës së Kampioneve kundër Liverpulit, edhe dje, në atë që duhej të ishte një ditë feste, si Fitër Bajrami, ylli i Liverpulit e përjetoi me lot. Edhe pse stafi mjekësor i kishte dhënë lejen që të luante, trajneri Hektor Kuper e kurseu (e la 90 minuta në stol) dhe gaboi rëndë, sepse Egjipti iu nënshtrua lojës së Uruguait. Këta të fundit e dominuan takimin, krijuan shumë raste, por nëse Luis Suarez gaboi në mënyrë të njëpasnjëshme raste flagrante, ndërsa Edinson Kavanit iu përgjigj dy herë në mënyrë mjeshtërore portieri afrikan, El Shenaji, Uruguai e gjeti shpëtimin te mbrojtja. Në minutën e 90-të, atëherë kur të gjithë prisnin vërshëllimën finale të ndeshjes, një goditje dënimi gjen në vendin dhe në kohën e duhur kokën e mbrojtësit të Atletikos, Gimenez, i cili fluturon mbi tre mbrojtës kundërshtarë dhe tund rrjetën. REKORDMENI TABAREZ - Dita e djeshme ishte një festë e dyfishtë për Uruguain, sepse përveç tri pikëve për fitoren, trajneri i tyre, Oskar Tabarez vendosi një rekord absolut, si ai që
ka drejtuar një kombëtare në katër Botërorë. 71-vjeçari, i cili vuan nga një sëmundje shumë e rëndë, edhe pse mbërriti në fushë me ndihmën e patericave, në momentin e golit të fitores mposhti dhimbjet dhe muskujt e tij të dobët, duke u çuar në këmbë dhe duke festuar, por në fund përshëndeti
edhe kundërshtarin: "Ishte një fitore e merituar, gabuam shumë, por edhe Egjipti na vuri në vështirësi. Ne shfrytëzuam mungesën e Salahut, sepse me të do të kishte qenë një tjetër histori. Por besoj se në ndeshjet e ardhshme, me Salah në fushë, Egjipti mund të jetë protagonist".