Kroaci-Nigeri, Perisiç bën presion

Sot kroatët përballen me "Super Shqiponjat" e Afrikës, Kaliniç: Asnjë frikë

Sulmuesi i Kroacisë, Ivan Perisiç, është shprehur se skuadra e tij duhet të mposhtë Nigerinë ( ndeshja luhet ditën e sotme në orën 21: 00) nëse duan të avancojnë në Botërorin rus. Europianët do përballen ndaj "Super Shqiponjave" ( pseudonimi i kombëtares afrikane) në ndeshjen e parë të Grupit D, sot në Kaliningrad. "Fitorja ndaj Nigerisë do na jepte shumë besim dhe për ne do ishte më e lehtë të vazhdonim rrugëtimin në këtë kompeticion. I respektojmë, pasi kualifikohen rregullisht në turnetë madhorë, por gjithçka është në duart tona dhe duhet të bëjmë një paraqitje të përkryer, komentoi Perisiç në konferencë për shtyp. "Ivani i Tmerrshëm", siç thirret kroati, premtoi më pas se lojtarët e Kroacisë duhet të japin maksimumin jo vetëm në ndeshjen e parë, por përgjatë gjithë kompeticionit. "Duhet të mbajmë një nivel të lartë, e them nga eksperienca. Sekreti? T'u presim krahët 'Super Shqiponjave'".

KALINIÇ - "Duhet të thyejmë Nigerinë për të avancuar". Nikola Kaliniç, rival në klube (duke qenë se vesh fanellën e Milanit dhe Ivani atë të Interit), ka ndarë të njëjtin mendim me shokun e skuadrës, Perisiç. "Kroacia ka sulmues të fortë, nuk jam i frikësuar nga sfida. Kemi cilësi më të mëdha se Nigeria, por duhet të tregojmë respekt: edhe ata janë të fortë në fazën ofensive, e kanë shfaqur ndaj Anglisë dhe do bëjnë pa dyshim të njëjtën gjë ndaj nesh. Duhen t'i mposhtur për të kaluar grupin". Ndërkaq, asnjëra prej dy kombëtareve nuk ka fituar një ndeshje hapëse në Botëror që prej 1999-ës...