Mesi hap plagët e vitit 2014: E merituam më shumë sesa Gjermania
Kapiteni i Argjentinës: Nuk e di nëse do të vazhdoj më
Leo Mesi e la të hapur mundësinë që Botërori i Rusisë të jetë i fundit në karrierën e tij. "Më pyesin nëse është Botërori i fundit, por unë nuk e di. Nuk e kam planifikuar akoma. Sigurisht që do të varet nga fakti se si do të shkojnë gjërat gjatë këtij muaji dhe se si do ta përfundojmë turneun", tha Mesi në një publikim të bërë nga gazeta "La Nacion". Këtë vit, ai do të luajë Botërorin e katërt me fanellën e kombëtares, pasi ka nisur të luajë që në vitin 2006 në Gjermani, pastaj në Afrikën e Jugut 2010 dhe në Brazil 2014. Në Botërorin e shkuar ai shkoi deri në finale, por u thye në shtesë nga Gjermania. Argjentina do të debutojë ditën e sotme kundër Islandës.
Hap pas hapi- Kapiteni i Argjentinës thotë se kanë shumë besim për të bërë mirë në këtë kompeticion, por nuk do të jetë aspak e lehtë. "Jemi përgatitur shumë mirë gjatë kësaj jave. Kemi lojtarë të mëdhenj dhe do të luftojmë çdo ndeshje. Duhet t'i marrim të gjitha një nga një, për të mos u shpërqendruar", vazhdoi më tej numri 10 i bardhekaltërve. Ai flet gjithashtu edhe për finalen e humbur kundër Gjermanisë dhe thotë se Argjentina e meritonte më shumë. "Në Brazil mësuam mentalitetin që duhet të kishim për të luajtur në Botëror. Duhet të vazhdojmë me të njëjtën rrugë edhe këtë herë. Mendoj se jemi më mirë dhe kemi më shumë eksperiencë. Ishim shumë afër fitores së këtij kompeticioni dhe e meritonim më shumë sesa Gjermania. Është shumë e vështirë të jesh kaq afër Kupës së Botës dhe të mos kesh mundësinë ta fitosh atë. Të humbasësh ashtu është e dhimbshme, por do të rikthehemi", theksoi Mesi.