Luftëtari pa “frena”, akord me fantazistin Erjon Vucaj
Ekskluzive/ Mesfushori shkodran pritet të firmosë
Erjon Vucaj është vetëm një hap larg firmës me Luftëtarin. "Panorama Sport" zbulon ekskluzivisht se në orët e fundit presidenti Grigor Tavo ka biseduar me fantazistin shkodran dhe në parim është rënë dakord për të firmosur marrëveshjen. Pritet që sot lojtari që mbylli sezonin me Vllazninë të bëjë takimin e fundit me kreun e klubit gjirokastrit dhe të nisë menjëherë stërvitjen. Kjo lëvizje "blic" e klubit bëhet edhe për faktin se fantazisti Eduard Rroca ende nuk është riaftësuar nga dëmtimi dhe mund të mungojë në ndeshjet e turit të parë të Europës. MIQËSORJA - Millosh Kostiç e ka nisur me këmbën e duhur aventurën futbollistike me Luftëtarin. Pas një jave përgatitjesh, bluzinjtë u përballën dje në miqësoren e parë me Butrintin, takim i cili u fitua nga gjirokastritët me rezultatin 2-0. Dy golat e Luftëtarit u shënuan në minutat e fundit të ndeshjes nga të rinjtë në provë, Aldrit Oshafi dhe Dhimitër Andoni. Trajneri Kostiç hodhi në fushë të rinjtë e afruar në këtë javë të parë të fazës përgatitore. Gjirokastritët e nisën miqësoren me portierin Ruci, Rrapën, Demon, Jankun, Rrapon, Karabinën,Moralesin, Ymerajn, Lamçen, Cekajn dhe Ziajin. Pjesë e formacionit ishte edhe Maldin Ymeraj, mesfushori 23vjeçar që sezonin e fundit luajti me Kukësin. Gjithashtu u provua edhe i riu me origjinë nga Gjirokastra, Andon Karabina, i ardhur nga kampionati grek. Pjesa e parë u mbyll me
rrjeta të paprekura, pavarësisht epërsisë së Luftëtarit. Në pjesën e dytë stafi teknik i Luftëtarit aktivizoi një pjesë të titullarëve. Nga këmbët e mesfushorëve Aleksi dhe Ramadani u gatuan golat e fitores, ku meritë kanë pa dyshim Oshafi dhe Andoni. Miqësoren e ndoqën edhe krerët e klubit, Tavo dhe zv.presidenti Dadaj. Tomor Shehu