"Kjo Gjermani e përçarë si ne në SHBA 1994"

Një skenë që është parë dhe riparë në humbjen ndaj Meksikës ishte goli i Hirving Lozanos. Sulmuesi dribloi Mesut Ozilin dhe e dërgoi topin në rrjetën e Nojerit. Por, çfarë ishte duke bërë mesfushori gjerman në zonën e penalltisë? Numri 10 u përpoq të shmangte atë që mund të shmangte. Le të kthehemi në Botërorin e 1994- ës në SHBA, kur Gjermania kampione bote u eliminua nga Bullgaria në çerekfinale. Sulmuesi Leçkov shënoi me kokë pas një krosimi. Markuesi i tij në ato momente ishte Tomas Hesler, i cili luftën në ajër nuk e ka pikën e tij më të fortë: 178 centimetrat e Leçkovit ndaj 166 centimetrave të Heslerit. Por, çfarë lidhje ka ky Botëror me atë skenë? Këtë e sqaron Lotar Mateus për "Sport Bild", kampion bote në Itali 1990 dhe pjesë e Gjermanisë edhe 4 vite më vonë në SHBA. "Liderë si Humels, Nojer dhe Myler duhet të sigurojnë që skuadra të qëndrojë e bashkuar dhe të mos përçahet në individualitete, ashtu siç bëmë ne në 1994. Ne kishim një skuadër, që në lidhje me individualitetet ishte të paktën me të njëjtin kualitet si në 1990, kur u shpallëm kampionë bote në Itali. Por, në SHBA të gjithë e kishin mendjen te vetja, kështu që ne u eliminuam me meritë në çerekfinale kundër Bullgarisë", shkruan rekordmeni i prezencave me fanellën e "Pancerave". Në komentin e tij, Mateus këmbëngul se edhe në 1990 në kombëtare kishte disa fraksione. Edhe këtu ai heq një paralele me 2014-ën. Por, në Brazil, Lëv i bashkoi grupet në Kampin Bahia. Skuadra u nda në dhoma sipas klubeve të Dortmundit, Shalkes dhe Bajernit. Kështu, shpirti i skuadrës u forcua. "Vetëm një gjë nuk duhet të ndodhë kurrë: që këto fraksione të vihen re në fushë". Ky është problemi i skuadrës së Lëvit që duhet parë sipas tij: "Ekipi gjerman nuk kishte unitet në fushë gjatë ndeshjes me Meksikën. Nuk kishte bashkëpunim. Të gjithë donin të bënin diçka, të nxirrte veten në pah". Ashtu si Mateus, e shikon edhe Ditmar Haman, i cili thotë se Gjermanisë i mungon një lider: "Nuk ka një udhëheqës si Shvajni, Lahm apo Klose. Mungon një dorë, një udhëheqës që të përveshë mëngët. Të gjithë kishin probleme kundër Meksikës, nga mbrojtja në sulm". 57-vjeçari kursen vetëm një lojtar nga kritikat: "Vetëm një pozicion nuk më shqetëson aspak: ai i portierit. Nojer më frymëzoi sërish kundër Meksikës".