Prenga nuk ka frikë: Japim maksimumin për të kaluar turin

Trajneri i Laçit flet pas hedhjes së shortit

Shorti i Europa Ligës e ka vënë skuadrën e Laçit përballë qipriotëve të Anorthosis, një skuadër e cila është mjaft cilësore. Megjithatë, në një intervistë për "Panorama Sport", trajneri i kurbinasve, Besnik Prenga, është shprehur se skuadra e tij do të bëjë maksimumin për të kaluar turin, edhe pse vlerëson kundërshtarin maksimalisht si një skuadër të fortë. Ai shprehet gjithashtu se do të kërkojë informacion për Anorthosisin nga lojtarë apo trajnerë që punojnë në Qipro me të cilët ka lidhje.

Cili është vlerësimi juaj për shortin e Europës që ju vuri përballë qipriotëve të Anorthiosit?

Shorti është shumë i vështirë, pasi kundërshtari ynë ka lojtarë elitarë. Tek Anorthosis luajnë futbollistë brazilianë, dy ish-lojtarë të ekipit kombëtar kroat, ka gjithashtu sollvenë dhe portugezë, që janë të rinj dhe cilësor. Megjithatë, kjo nuk do të thotë se ne i druhemi dhe duhet të japim 120 përqindëshin tonë.

Mos ndoshta duhet të kënaqeni që evituat transfertat e largëta?

Unë jam trajner dhe nuk mendoj për udhëtimet e largëta, unë mendoj që të kaloj turin. Kjo është puna jonë dhe duhet të përgatitemi për të dhënë maksimumin, pasi çfarë drejtuesi do të jem unë në rast se nuk kam shpresa se mund të arrijmë larg?

Sa e njihni ekipin kundërshtar?

Të them të drejtën, nesër do të fillojmë të përgatisim këtë ndeshje, ndërsa për kundërshtarin do të gjejmë të dhëna, pasi kam miq që janë pjesë e kampionatit kroat të futbollit dhe do të marr informacione nga ata.

Kur mendoni se Laçi mund të kompletohet dhe të jetë gati për të nisur nga puna për ndeshjet europiane?

Po presim që nesër (sot) lojtarë të rinj, të cilët do të vijnë nga merkato. Janë lojtarë që do të vijnë edhe nga jashtë edhe nga brenda vendit. Do të fillojmë të lëvizim, pasi nuk kemi kohë për të humbur.

Nga brenda vendit prisni lojtarë nga Skënderbeu apo nga Vllaznia?

Nuk mund të them gjë, por si nga Skënderbeu edhe nga Vllaznia mund të marrim. Por, me këto çështje merret presidenti. Unë mendoj për stërvitjen dhe ata lojtarë që do të kem në dispozicion do të bëj maksimumin për paraqitje sa më dinjitoze.