Gjashtë herë kampion dhe buxhet 1 milion euro, kush është Ventspils
Ventspils është rivali i Luftëtarit në turin e parë të Ligës së Europës. Klubi letonez i luan ndeshjet në "Ventspils Olimpiskais" në qytetin Ventspils, duke milituar në Virsliga (niveli më i lartë i futbollit në Letoni). Në total, FK Ventspils ka fituar gjashtë tituj kampionë dhe shtatë herë Kupën e Letonisë. Në vitin 2009, FK Ventspils u bë klubi i parë letonez që mori pjesë në fazat e grupeve të një kompeticioni të UEFA-s, pikërisht në Ligën e Europës, pasi eliminoi
BATE Borisov. Më 17 korrik 2007, Ventspils ka bërë debutimin në Ligën e Kampionëve, ndërsa për herë të parë në Europë ka marrë pjesë përmes Kupës Intertoto në vitin 1999. Aktualisht, skuadra e drejtuar nga trajneri malazez, Dejan Vukiçeviç, sipas të dhënave të faqes së specializuar "transfermarkt", vlen rreth 3.6 milionë euro. Sa i përket krahasimit në shifra, Luftëtari vlen 100 mijë euro më shumë se rivali letonez, me 3.7 milionë euro. Lojtari më i kushtueshëm i Ventspils është ish-mbrojtësi i përfaqësueses letoneze, Naurits Bulvitis, si dhe sulmuesi ukrainas, Oleksiy Antonov. Kampionati në Letoni ka nisur prej muajit mars, me Ventspilsin që ndodhet në vend të tretë dhe ka luajtur 11 javë. Gjatë këtij sezoni, protagonist absolut te Ventspils është bërë sulmuesi nigerian, Akinemi, i cili ka shënuar 8 gola në 11 ndeshje. Klubi letonez ka një buxhet vjetor prej 1 milion eurosh.
BASHKIMI I DY KLUBEVE
Ventspils u themelua në vitin 1997, me bashkimin e dy ish-klubeve FK Venta dhe FK Nafta. Në fakt, Venta ishte një nga klubet kryesore në ligën e Letonisë në vitet '60. Ndërsa FK Nafta u formua në vitin 1995, teksa në sezonin e parë klubi fitoi titullin në Divizionin e Dytë. Historia e Ventspils filloi në vitin 1997. Në shkurt 2007, klubi që përfaqëson qytetin në bregun e lumit Venta me një popullsi prej 45 mijë banorësh, festoi 10-vjetorin. Në një periudhë relativisht të shkurtër Ventspils është bërë një nga klubet më të forta në Letoni, duke fituar reputacionin e një skuadre. Në vitin 2003 Ventspils fitoi Kupën e Letonisë për herë të parë në historinë e klubit. Dominimi i Ventspils ka ardhur në vitet 2006, 2007, 2008. Trajneri ukrainas, Roman Grygorçuk, që dikur ka drejtuar Elis Bakajn dhe Kristi Vangjelin te Çernomortes, udhëhoqi Ventspils drejt trofeut të parë.