Epokë e re tek Apolonia, Miho: Do shihni një ekip të frikshëm
Trajneri tregon për marrëveshjen me disa lojtarë
Dinamika e zhvillimeve në këto ditë qershori në kampin fierak, hapja e një faqeje të re për skuadrën, politikat konkrete të administratorit të ri, firmat e para që dëshmojnë se Apolonia e ka seriozisht këtë sezon, kanë bërë që shumë lojtarë të kthejnë sytë nga skuadra fierake dhe të rritet interesi e vëmendja ndaj bardhejeshilëve. Nuk janë pak ata që kanë shfaqur interes dhe i janë afruar Apolonisë me dëshirën për të qenë pjesë e skuadrës së ardhshme, por nga ana tjetër nuk mungojnë as ekzagjerencat në kërkesat e disa lojtarëve që ka shfaqur interes klubi. Ka futbollistë që janë treguar më tepër "narcistë" se ç'duhet me vetëvlerësimin, duke kërkuar shumë më tepër se mundësitë maksimale të klubit modest fierak nga ana ekonomike. Në këtë kontekst kanë filluar "dhimbjet e kokës" për fierakët, sidomos për trajnerin Marjol Miho, pasi ka dy pista testimi: ata që kërkon dhe ata që vetofrohen. Nisur nga ky fakt dhe nga dyndja e kërkesave të lojtarëve që vetëkërkojnë të vishen bardhejeshil, kryepankina fierake ka një mesazh të qartë: "Jemi në fazën nistore të formatimit të skuadrës së ardhshme dhe puna po ecën me ritme të kënaqshme. Veç nënshkrimit me lojtarët aktualë që na interesojnë, kemi arritur marrëveshje të rëndësishme me disa futbollistë të tjerë, tre prej të cilëve kanë nënshkruar për dy vjet me ne: Nako, Buzi dhe Hidershaha. Shumë shpejt do të kemi firma të tjera dhe më 10 korrik, ditën e parë të grumbullimit, do të kemi mundësi të shohim një skicim të qartë të Apolonisë që po synojmë të ndërtojmë. Në këtë skuadër nuk luhet as me emër e as me moshë, por nga ajo që se kush nga lojtarët di dhe jep në fushë. Ja, kjo do të jetë Apolonia, skuadra me emër të madh që pret shumë nga ne", thotë Miho. Bujar Rama