Mustedanagiç: Lojtari i Olimpiakosit zgjodhi Greqinë
U-17: Çavo na ka refuzuar, do të bindim Mukën
Kombëtarja U- 17 do të zhvillojë një grumbullim disaditor dhe dy ndeshje miqësore me Bosnje Hercegovinën, mirëpo në fillim, do të jetë koha e përfaqësueses U-16. Trajneri Xhemal Mustedanagiç, gjatë një konference për shtyp në FSHF, ka treguar axhendën dhe qëllimin e këtij grumbullimi. "Do të kemi një grumbullim për dhjetë ditë me dy breza lojtarësh. Ditët e para do të jetë me moshat e datëlindjes 2003 dhe te ky grumbullim 15 lojtarë janë nga jashtë, ndërsa pjesa tjetër nga lojtarët vendës. Ky është grumbullim për seleksionime. Më 24 do të afrohen edhe 24 futbollistë të tjerë të kampionatit shqiptar. Do të kemi dy ndeshje, ku do të jenë në vëzhgim mbi 40 lojtarë dhe pesë portierë. Është një vëzhgim i detajuar që nga themelet për të pasur më të mirët në Kombëtare. Pas përfundimit të grumbullimit, do të nisim nga puna me moshat 2002, me të cilët do të luajmë dy miqësore, më 27 dhe 29 të këtij muaji, me Bosnje Hercegovinën që është skuadër e fortë. Gjithashtu, do të analizojmë Norvegjinë, kundërshtarin tonë të parë me të cilin do të luajmë në shtator për kualifikueset që zhvillohen në vendin tonë. Kam besim që janë breza të fortë si ata 2002, edhe ata 2003", ka shpjeguar trajneri Mustedanagiç për grumbullimin e radhës.
REFUZIMET - Ai ka treguar edhe rastin e dy futbollistëve të Olimpiakosit, një prej të cilëve ka zgjedhur Greqinë dhe një tjetër që është ende i pavendosur. "Më vjen keq që Çavo ka vendosur që të luajë për Greqinë gjithashtu edhe Muka, i cili nuk ka vendosur ende përfundimisht. Janë lojtarë të Olimpiakosit, Muka ka lindur atje dhe ka vendosur të luajë për Greqinë. Drejtori i ekipeve kombëtare, Babamusta, ka punuar shumë me dy lojtarët që t'i bindë dhe ka pasur kontakte edhe me prindërit e tyre. Vetë lojtarët bashkë me prindërit kanë bërë atë zgjedhje, i referohem Çavos. Për Mukën, ne do të bëjmë maksimumin që të na bashkohet. E rëndësishme është që të vijë vetëm një herë dhe, sapo të shohë si punojmë dhe si jemi të organizuar, kam bindjen që do të na pranojë", ka deklaruar trajneri i Kombëtares U-17, i cili mbikëqyr edhe atë U-16, Xhemal Mustedanagiç.