Shehi do ndihmësit e Dajës, klubi mendon për rikthime
Skënderbeu duket se tashmë nuk ka më kohë të humbë për sa i përket përjashtimit nga Europa për këtë sezon. Tashmë, gjithçka duhet përqendruar në ndërtimin e ekipit për sezonin e ri. Duket se gjithçka do të nisë ndryshe duke parë edhe trajnerin e ri që do të jetë Orges Shehi. Me ishgardianin në stol, korçarët kërkojnë që të mbajnë sa më të bashkuar ambientin bardhekuq dhe natyrisht që vjen një person, i cili e ka idenë shumë mirë se çfarë po kalon klubi në këto moment dhe mbi të gjitha di se ku duhet të përqendrohet më shumë në bazë të planeve. Me Shehin që është thuajse i zyrtarizuar si trajner i Skënderbeut dhe mungon vetëm prezantimi, duket se do të jetë i njëjti staf që punoi këto vite me korçarët. Burime pranë klubit bëjnë me dije se si Ilir Bozhiqi ashtu edhe Ardian Mema duket se kanë dhënë fjalën e tyre për të qëndruar te Skënderbeut në të ardhmen. Në këtë mënyrë, Shehi merr me vete dy ndihmësit e trajnerit Ilir Daja për të nisur këtë aventurë të re në Korçë në rolin e trajnerit. Në ditët në vijim pritet që të kemi edhe prezantimin zyrtar nga ana e Skënderbeut për të vendosur gjërat në vijë në pritje të përgatitjeve sezonale, ndërsa në gusht korçarët do të luajnë në Superkupën e Shqipërisë ndaj Laçit. Merkatoja Natyrisht që në të tilla momente merkatoja në dalje është ajo që bën më shumë bujë në radhët e korçarëve, pasi klubi ndodhet në një pozicion jo fort të përshtatshëm për të ardhmen. Por, gjithsesi, indicet e para janë se Skënderbeu do të vijojë të jetë një ekip me peshë në kampionatin shqiptar. Veç largimeve të deritanishme, që për shkak të mungesës së një kontrate mund të quhen edhe firot e para me klubin bardhekuq, korçarët janë të vendosur në maksimum për të shfrytëzuar çdo mundësi që do t'iu jepet për transferimin e lojtarëve jashtë Shqipërisë, me qëllim që të përfitojnë sa më shumë financiarisht. Financa, të cilat do të përdoren për të mbajtur bilancin pozitiv të klubit. Në të tilla kushte duket se pikat e referimit për këtë sa thamë më sipër do të jenë Gavazaj, Xhejms, Nimaga, por edhe Dejvi Bregu që do të jetë pjesë e Luftëtarit për Europën. Rikthimet
Gjithsesi, duket se veç merkatos në dalje, bardhekuqtë do të punojnë edhe për disa rikthime të rëndësishme në ekip që do të mbushin grupin nën drejtimin e Shehit. Normalisht, janë shumë lojtarë që kanë përfunduar si huazime në Kosovë e Maqedoni mbi të gjitha, të cilët Skënderbeu do të kërkojë t'i rikthejë në ekip. I pari që pritet të kontaktohet pas Europës është Bruno Lulaj në radhët e Laçit e menjëherë pas tij do të vijohet me Serxhio Zhunjor e Gofrei Çarls, të cilët së bashku me Oto Xhon pritet që të vihen nën urdhrat e Shehit për të testuar se sa të vlefshëm do të jenë për ekipin. Përpos kësaj, pritet që gjithçka fillimisht të nisë me zyrtarizimin e trajnerit të ri që mendohet të ndodhë javën e ardhshme. Llazi Saro