Gati një formacion për Elbasanin
Nga Miraka te Lamçja, një grup që jep shumë garanci për ngjitjen në Superiore
Një qytet i tërë në merkato. Bëhet fjalë për Elbasanin, një zonë që është shquar për futbollistë, të cilët kanë dhënë dhe japin kontributin e tyre për ekipe elitare në futbollin shqiptar, me disa që kanë shtegtuar edhe jashtë vendit. Në pamundësi për klubin mëmë që t'i afrojë në skuadër, janë të detyruar të japin kontributin e tyre për kampe të tjera, përpos dëshirës që kanë për të ndihmuar klubin e vendlindjes. "Panorama Sport" ju jep një pasqyrë të qartë të lojtarëve elbasanas në merkato, të cilët janë lakuar shumë gjatë kësaj periudhe vere dhe ende nuk dihet destinacioni i tyre final. FORMACIONI I MERKATOS
Bëhet fjalë për lojtarë që ende nuk kanë firmosur me ekipet e tyre, pavarësisht tratativave të shumta që kanë pasur. 11 lojtarë që mund ta rikthenin Elbasanin pretendent, pa llogaritur pjesën tjetër që sezonin e kaluar kanë qenë pjesë e verdhebluve apo që kanë kontratë
me ekipe të tjera. Kështu, në portë një lojtar i lirë është Festim Miraka, i cili e mbylli sezonin e kaluar me Besën. Një mbrojtje e përbërë nga katër, me Klajdi Broshkën në të djathtë, Elton Basriun dhe Xhuljan Turhanin në qendër, ndërsa Aldo Bella nga e majta. Për sa i përket mesit të fushës, ka një mbipopullim futbollistësh. Ardit Hila dhe Orgest Gava para mbrojtjes, ndërsa Renato Hyshmeri dhe Emiljano Musta nga krahët. Për sa i përket sulmit, Arsen Kasa, i cili luajti me verdheblutë fazën e dytë, do të ndihmojë në repartin e avancuar Eri Lamçen. Bëhet fjalë për një ekip titullarësh që përveç Hyshmerit dhe Kasës sezonin e kaluar, luajtën për skuadra të tjera dhe në këtë periudhë merkatoje po lakohen nëpër ekipe të ndryshme. Pothuajse të gjithë janë rikthyer në Elbasan për pushime dhe vazhdojnë të bëjnë stërvitje individuale këtë periudhë.
NDËRTHURJE BREZASH
Bëhet fjalë për ndërthurje brezash, me futbollistë që mund të konsiderohen në kulmin e karrierës së tyre, të cilët një klub si Elbasani nuk ka forcën dhe financat e duhura për t'i rikthyer në skuadër. Po t'i shtojmë edhe një numër akoma më të madh lojtarësh që janë në kontrata me skuadra të tjera, futbollistët elbasanas janë të shumtë. Kjo tregon se klubi nuk ka vuajtur për futbollistë, por për menaxhim. SITUATA
Aktualisht, të gjithë lojtarët dhe stafi teknik i Elbasanit janë me pushime. Pas përfundimit të kampionatit ku verdheblutë siguruan ngjitjen në Kategorinë e Parë, ekipi ka nisur pushimet dhe askush nuk di të thotë se kur do të grumbullohet. Burime pranë Elbasanit bëjnë të ditur se ekipi do të mblidhet në korrik për të nisur përgatitjet për sezonin e ri. Gjithçka do të nisë me caktimin e trajnerit të ri që do të drejtojë ekipin.