Greca te Laçi, Ze Maria del kundër huazimit
Kurbinasit duan sulmuesin e Tiranës për Europën, ikën Ansi Nika
Pas mbrojtësit Erjon Hoxhallari, dje paradite klubi i Laçit arriti akordin me Tiranën për të marrë në formë huazimi për Ligën e Europës një tjetër futbollist bardheblu. Bëhet fjalë për sulmuesin e krahut, Bedri Greca, i cili doli menjëherë në stërvitje me kurbinasit për të fituar sa më shpejt formën në prag të ndeshjes ndaj Anorthosis, që do të luhet më 12 korrik. "Panorama Sport" mëson se presidenti Laska ra dakord me homologun e tij te Tirana, Refik Halili, që Greca të jetë pjesë e Laçit derisa klubi kurbinas të eliminohet nga Liga e Europës. Mirëpo, në pasdite kur klubi bardheblu njoftoi trajnerin Ze Maria për këtë lëvizje, ky i fundit vuri veton. "Mos e huazoni, mund të dëmtohet", mësohet t'u ketë thënë braziliani drejtuesve të Tiranës. Kësisoj, akordi mes klubeve u prish pas vetëm pak orësh. Por, në mbrëmje trajneri dhe Halili diskutuan sërish, teksa nuk është çudi që sot të ketë një tjetër vendim, që Greca të huazohet. IKËN ANSI NIKA
Nëpërmjet një postimi dje në faqen
personale në "Instagram", mesfushori shkodran, Ansi Nika, ka bërë zyrtar largimin nga klubi i Laçit. Lajmin që "Panorama Sport" e kishte paralajmëruar disa ditë më parë, lojtari e ka konfirmuar të dielën, teksa ka falënderuar trajnerët, shokët, tifozët si dhe presidentin për këto 1
vite e gjysmë në Laç. Gazeta mëson se trajneri i ri, Besnik Prenga, ka pasur ide të tjera për mënyrën e lojës dhe shkodrani nuk ishte në planet e tij për të qenë pjesë e formacionit. Në këto kushte, Nika ka kërkuar largimin dhe ka gjetur mirëkuptimin e drejtuesve. "Nga sot nuk do jem më pjesë e Laçit. Faleminderit për mirënjohjen e të gjithëve, për përkrahjen dhe mbështetjen. Kalova 1 vit e gjysmë plot emocione të paharrueshme. Ishte një vit plot sukses, arritëm Kupat e Europës, si dhe ishim në finalen e Kupës. Një aventurë e bukur plot emocione. I falënderoj të gjithë, presidentin, trajnerët, shokët dhe tifozët. Forca Laçi!", shkruante Nika në postimin e tij. Nuk dihet tashmë se cila do të jetë skuadra e re e mesfushorit, i cili ka disa oferta, jo vetëm nga klubet e Superiores, por gjithashtu edhe nga skuadra të Superligës kosovare.