Angli e pamëshirshme, 6 gola dhe rekord historik
Goli i gjashtë vjen pas 25 pasimesh, “djegin” Kambiason
Nuk ishte një ndeshje... Ishte një shëtitje angleze në të nxehtin e Nizhni Norvgorodit. Rezultati 6-1 i skuadrës së Garet Sauthgejt kundër modestëve të Panamasë kualifikon "Tre Luanët" në 1/8-at (dhe së bashku me ta edhe Belgjikën, ndërsa edhe Tunizia eliminohet matematikisht), por në të njëjtën kohë shenjtëron Herri Kejnin si bomberin e Botërorit deri tani, sepse me tripletën e djeshme ngjitet në kuotën e 5 golave dhe kalon Ronaldon. Në të njëjtën kohë, Anglia vendos edhe një rekord historik, duke qenë se në rastin e golit të gjashtë, "banda" e Sauthgejtit dërgon topin në rrjetë pas 25 pasimeve radhazi të sakta dhe në këtë mënyrë "djeg" rekordin e golit të Kambiasos (24 pasime), në Botërorin e 2006-s, kur Argjentina mposhte Serbinë.
5 GOLA NË 45 MINUTA - Pjesa e parë ishte një bombardim anglez: pesë gola mes minutës së 8-të dhe 44-t. Ai që ngre siparin ishte Stons, me një goditje me kokë. Dyfishimi vjen në të 22-ën, me penalltinë e ekzekutuar saktë nga Kejn, pas faullit të Eskobarit ndaj Lingardit. Panamaja shfryhet totalisht dhe në të 36-ën vjen festa angleze e radhës, një "perlë" pakapshme e Lingard, e cila ekzalton aq shumë "Tre Luanët", të cilët nuk kënaqen së kafshuari dhe realizojnë edhe dy herë të tjera. Në të 40-ën Stons është në delir total, pasi feston dopietën personale të paimagjinueshme, pas një aksioni të dirigjuar nga Henderson dhe Sterling. Dhe në sekondat finale, një tjetër penallti për ishullorët, që sërish Kejn e ekzekuton saktë, por Stons është përsëri protagonist, pasi e fiton atë në dëm të një faulli të Murijos.
TRIPLETË E KEJN - Në pjesën e dytë, Anglia nuk shpërdoron
energji të kota, madje edhe goli i 6-0 maturon nga një prekje me shumë fat: goditje e Loftus-Çik dhe devijim me fat i Kejnit, që feston tripletën personale. Në fazën e grupeve, vetëm Hant në 1966 dhe Geri Lineker në Botërorin e vitit 1986 kishin arritur që të realizonin nga një tripletë. Dhe kaq mjafton që Anglia të niste stafetën e zëvendësimeve, me Vardinë që bën debutimin e tij në një Botëror.
BALOI NË HISTORI - Gjithsesi, nëse Anglia përmbush misionin e saj, Panamaja edhe pse e dërrmuar nga 6 gola, mund të festojë, sepse në të 78- ën, Baloi dërgon në rrjetë, në rrëshqitje, e sipër goditjen e dënimit të Avilas dhe tifozët e Panamasë shpërthejnë në festë, njësoj sikur të kishin fituar. Baloi, 37-vjeçar, kishte vetëm 9 minuta në lojë, por ky gol do të mbetet historik, pasi ishte i pari për Panamanë në një Botëror.