Sekreti i Sauthgejt, jelek për të thyer makthin 52-vjeçar anglez në Botëror
Veshja bëhet "çështje", mendohet të jetë homazh
Taktikat inovative të Garet Sauthgejt kanë bërë që trajneri të fitojë një numër të madh fansash, teksa po drejton Anglinë në përpjekje për t'i dhënë fund një "mallkimi" 52vjeçar në Kupat e Botës. Nuk është vetëm formacioni, megjithatë, i vetmi detaj i kuruar nga Sauthgejt: zgjedhja e jelekut po shndërrohet thuajse në një kult dhe arsyet mbeten personale. Nipi i një ishpjesëtari të Marinës Mbretërore, veshja mund të jetë një përkujtim i gjyshit Artur Toll, sipas tabloidit "Daily Mail": në "Woody and Nord", biografinë ku portretizohet miqësia e trajnerit anglez me ish-lojtarin e Kristal Palas Endi Udman, Toll thuhet se ndiente një krenari të madhe për mënyrën e veshjes, duke u kujdesur që jeleku të ishte gjithmonë perfekt. Ky mund të jetë edhe "sekreti" i gardërobës së Sauthgejt.
I VENDOSUR - U sulmua pas humbjes ndaj Belgjikës, por u përgjigj se nuk ndryshon mendje për vendimet e tij: lënia pushim e Herri Kejn në ndeshjen ndaj Belgjikës ishte, sipas tij, vendimi i duhur, pavarësisht humbjes së "Tre Luanëve" dhe mbyllja e fazës së grupeve në vendin e dytë. Golashënuesi më i mirë i turneut u la në bankinë, pasi Sauthgejt preferoi rotacionin (ndeshja nuk vendoste daljen nga grupi, por renditjen e vendeve të para): "Ishte një ndeshje që donim ta fitonim, por po aq e nevojshme ishte të siguroheshim që lojtarët tanë kryesorë të pushonin e të kursenin energjitë përpara ndeshjes më të madhe të një dekade për Anglinë, sepse tashmë ishim të kualifikuar". Pas humbjes, Anglia tani do përballet me një provë të vështirë, kundër Kolumbisë, në 1/8-at e Botërorit, më 3 korrik. E pas paraqitjeve dinjitoze që anglezët nuk po i shihnin prej vitesh, ndoshta duhet pasur më shumë besim te "Xhentëlmeni" Sauthgejt.