Gega në delir: Munda një kampione olimpike
"Objektivi i radhës, triumfi në Kampionatin Europian"
Luiza Gega, kampion ia kuqezi, triumfoi në Lojërat Mesdhetare "Tarragona 2018" në disiplinën e 3000 metrave me pengesa, duke arritur një kohë fantastike 9'27"73, që i mundësoi medaljen e artë në këtë event. Suksesi që mori Luiza ishte i pari për atletikën shqiptare në të gjithë historinë e pjesëmarrjeve në Lojërat Mesdhetare. Një arritje e jashtëzakonshme që Gega e rrëfen në një prononcim për "Panorama Sport".
Çfarë mund të thoni për suksesin e jashtëzakonshëm që arritët në Tarragona? Kujt ia dedikoni?
Sigurisht jam shumë e gëzuar për arritjen e medaljes së artë dhe thyerjen e rekordit të Lojërave Mesdhetare. Rezultatet e mia janë në progres të vazhdueshëm dhe sigurisht e dinim që do të isha në zonën e medaljeve, por për vendin e parë duhet të luftohej shumë me kundërshtaren time direkte, tunizianen Grihbi, që është kampione olimpike dhe botërore në këtë disiplinë. Gara ishte e fortë, por aty tregova kondicion më të mirë fizik se kundërshtarja dhe pavarësisht se bëri tentativa të më afrohej, në përfundim e lashë 40-45 metra mbrapa në vijën e finishit. U gëzova dhe për një arsye tjetër, pasi është hera e parë për mua që marr medalje ari në këtë aktivitet, pasi 5 vjet më parë në Mersin, jam kurorëzuar nënkampione Mesdheu. Kjo është medalja e pare e artë për atletikën shqiptare në Lojërat Mesdhetare në të gjithë historinë e saj të pjesëmarrjeve dhe kjo më jep emocion të veçantë. Stërvitja dhe përkushtimi janë ato që japin gjithmonë rezultatin e dëshiruar, por sigurisht me ndihmësen e familjes e trajnerit që janë gjatë gjithë kohës ndihmesë e pakushtëzuar për mua.
Si ndiheni fizikisht dhe cili është objektivi i radhës?
Ndihem në një formë shumë të mirë fizike. Aktualisht, jam sportistja më e mirë në Europë dhe kam dy kohët më të mira në disiplinën e 3000 metrave me pengesa, e më pas vijnë kundërshtaret e tjera. Objektivi i radhës do të jetë Kampionati Europian i Atletikës që zhvillohet në Berlin në datat 7- 12 gusht. Sigurisht, konkurrenca do të jetë shumë e fortë, por unë do të bëj më të mirën time. Sapo të kthehem nga Tarragona do të futem në një minifazë përgatitore për Kampionatin Europian të Atletikës.
Cilat janë vështirësitë më të mëdha që keni? A keni pasur mbështetje nga shteti dhe federata?
Vështirësia më e madhe aktualisht për atletikën është infrastruktura totalisht e shkatërruar në qytetin e Tiranës, ku nuk ka më asnjë pistë qoftë dheu, e jo më tartani për të ushtruar stërvitjen. Për këtë arsye jam e detyruar të shkoj në Elbasan apo të jem e grumbulluar në Korçë gjatë periudhës më të madhe të sezonit veror. Nga mesi i vitit 2017 e deri më tani në vitin 2018 nuk kam pasur asnjë mbështetje financiare nga federata për grumbullime, stërvitje apo gjëra të domosdoshme për të mundësuar stërvitjen. Sigurisht që trajneri ka dërguar projekte në federatë e ka qenë shpesh në kontakt me ta, por sipas institucionit të FSHA-s fondet janë të reduktuara dhe vijnë nga viti në vit në zbritje, gjë që e bën të pamundur plotësimin e kushteve bazë për stërvitje.