Partizani gjobit Kotobellin
Të kuqtë bllokojnë transferimin e tij, si dhe paralajmërojnë padi civile
Mbrojtësit Blerim Kotobelli do t'i k u s h t o j n ë shumë dy intervistat e dhëna gjatë qershorit, të cilat të kuqtë i quajnë pa leje, por mes të tjerave pretendohet edhe cenimi i imazhit të klubit. Partizani ka reaguar me dorë të hekurt ndaj deklaratave mediatike të Kotobellit. Klubi i kuq, duke u bazuar në rregulloren e brendshme të disiplinës, ka marrë masë të rëndë administrative ndaj Blerim Kotobellit, i cili është zyrtarisht nën kontratë me Partizanin deri më 30 qershor 2018. Burime pranë palëve kanë bërë me dije për "Panorama Sport" se vlera e gjobës kap shifrën e 7 mijë eurove (rroga e dy muajve). Masa administrative ka të bëjë jo vetëm me dhënien e deklaratave për shtyp në mënyrë të paautorizuar nga klubi nga ana e Kotobellit, por përmbajtja e tyre përbën dhe cenim të imazhit të klubit, si dhe përhap publikisht informacione që lidhen me marrëdhënien kontraktuale mes palëve. Të gjitha këto rrethana përbëjnë shkelje të rëndë të rregullores së brendshme të disiplinës të Partizanit. Megjithatë, burimet sqarojnë se klubi i kuq nuk është mjaftuar me kaq. Përmes një shkrese të përcjellë pranë FSHF-së, Partizani ka kërkuar nga kjo e fundit
bllokimin e regjistrimit të Blerim Kotobellit, pas datës 30 qershor 2018, me cilindo klub tjetër, vendës apo i huaj, derisa vlera e gjobës të paguhet plotësisht nga lojtari. Pra, sipas Partizanit, Kotobelli figuron lojtar me detyrime të pashlyera dhe derisa ai të
likuidojë klubin për gjobën e marrë, regjistrimi i tij pas ditës së sotme te klube të tjera nuk mund të realizohet. Veç kësaj, mësohet klubi Partizani po përgatit edhe një padi civile në gjykatën e Tiranës kundër Blerim Kotobellit, për dëmtim të imazhit të klubit përmes
deklaratave të lëshuara nga lojtari përgjatë muajit qershor. Në fillim, mbrojtësi akuzoi klubin se e ka keqtrajtuar, ku akuzonte edhe trajnerët për zgjedhjet që bënin, ndërsa në prononcimin dytë ka pohuar se Partizani i detyrohet katër rroga të pashlyera.