Miqësore me Laçin, Plori nis seleksionimet
Kastrioti do të përballet sot me Laçit, në testin e parë miqësor që pas ngjitjes në Kategorinë Superiore. Axhenda ka ndryshuar për shkak të shirave, ndaj kjo miqësore do të luhet sot në Kamzë në orën 14:00. Kjo do të jetë një provë e rëndësishme edhe për futbollistët që po testohen te krutanët. Ata do të aktivizohen në përballjen me Laçin nga ku, në përfundim të kësaj miqësoreje, stafi teknik do të marrë edhe vendimin se kush kalon në fazën tjetër të provës. Trajneri i Kastriotit, Elvis Plori, në një prononcim të shkurtër për "Panorama Sport" tregon disa detaje në lidhje me ecurinë e përgatitjeve, si edhe planet që ka në vazhdim. "Po vijojmë normalisht përgatitjet dhe po u kushtojmë një rëndësi të veçantë lojtarëve që kemi në provë. Kemi futbollistë të ndryshëm të çdo niveli, që kanë ardhur të testohen te ne. Kemi vendosur që në fundjavë t'i shikojmë edhe në ndeshje se çfarë janë në gjendje të bëjnë. Pas këtij testi do të fillojmë edhe me seleksionimet e para. Atyre që janë në një nivel deri diku të pranueshëm kemi vendosur që t'u japim edhe një tjetër javë kohë për t'u përmirësuar. Ndërsa, me pjesën tjetër do të na duhet që të ndajmë rrugët. Synimet tona janë që të gjejmë ndonjë element cilësor, që do të na bënte punë. Gjithashtu, po punojmë edhe në merkato dhe deri më 10 korrik, të kemi zyrtarizuar 5 afrime, duke ditur se në këtë datë skuadra do të niset për fazë përgatitore", u shpreh trajneri i Kastriotit, Plori, për "Panorama Sport". Liridon Pasha