Ramos: Shpresoj të mos jetë fundi i një cikli
“Uroj që mundimi të jetë parë, tentuam në çdo mënyrë”
Dukej e pabesueshme (ndoshta jo edhe aq shumë), por është e vërtetë: Spanja është eliminuar nga Rusia, vendi organizator, në 1/8-at e Kupës së Botës. Pas 120 minutave ku skuadrat u ndanë në barazim 1-1, ishin llogaritë e penalltive, ato që vendosën se kush do të kalonte në çerekfinale. Dhe fati u buzëqeshi rusëve. U kritikuan që përpara nisjes së turneut: që pas shkarkimit të Hulen Lopeteguit, i cili nisi një aventurë të re me Realin e Madridit, jo shumë përpara nisjes së skuadrës për në Rusi, pati shumë mosbesues. Të lënë "jetimë" nga trajneri i tyre që i udhëhoqi me gola dhe paraqitje në kompeticion (deri në atë moment shiheshin si favoritë), emërimi i Fernando Hierros shfaqi dyshimet e para.
FLET RAMOS - Pas ndeshjes, në zonën mikse, kapiteni Sergio Ramos pranoi të fliste për gazetarët prezentë, megjithëse shumë i mërzitur nga disfata e përfaqësueses së tij. Ashtu si e gjithë skuadra spanjolle. "Jemi shumë të zhgënjyer, - u shpreh qendërmbrojtësi i Real Madridit. - Ky është një nga momentet më të vështirë të jetës sime. Por, janë gjëra që ndodhin. Ndihem krenar që jam spanjoll. Ishte një ndeshje e vështirë: dominuam, patëm mundësi për të fituar, por nuk arritëm të shfrytëzonim rastet e krijuara. Të gjithë ëndërronim të ngrinim trofeun. Gjithsesi, jam krenar për shokët e mi, krenar për kombëtaren dhe shpresoj që edhe tifozët në stadium dhe në Spanjë ta kenë parë se u munduam me të gjitha mënyrat për të fituar".
"JEMI SOLIDË" - Në fund, Ramos e mbylli me një "urim" për kombëtaren, tek i cili
shpreson i gjithë kombi iberik. "Shpresoj të mos ky jetë fundi i një gjenerate, i një cikli, pasi kemi një skuadër solide mbi të cilën mund të punojmë. Shpresoj të kemi ende mundësi të fitojmë kompeticione madhore dhe të bëjmë të mundur që tifozët të ndihen krenarë".