Nga Pezela te Dibala e Ikardi, Argjentina e ka brezin gati
Si mund të ndryshojë kombëtarja pas dështimit
Botërori për Argjentinën përfundoi, përpara, shumë përpara kohe sesa mund të ishte menduar, por nëse nuk duan që të përjetojnë një dramë të radhës, atëherë është mirë që Federata të nisë të kontrollojë frerët dhe të mendojë për të përgatitur brezin e ri, në pritje të Botërorit të vitit 2022, në Katar, por duke kaluar nga Kupa e Amerikës 2019. Fatmirësisht, talenti nuk i mungon, madje e kanë me shumicë, por thjesht duhet kultivuar me kujdes dhe mbi të gjitha me besim, pasi për të mbrojtur me krenari fanellën, nevojitet eksperiencë dhe duke filluar nga porta e deri te sulmi, klanet "Mesi" apo sido që të quhet tjetër, duhet të marrin fund. PORTA - edhe pse Paton Guzman dhe Franko Armani janë të rinj, shumë shpresa ka te Xheronimo Ruli, 26 vjeç, i cili meritonte një shans që në këtë Kupë Bote, por edhe ai ishte një nga përjashtimet e përfunduara nën akuzë, nga trajneri Horge Sampaoli. MBROJTJA - Nga grupi aktual me perspektivën "Katar 2022" do të mbijetojë me shumë mundësi Niko Taljafiko (26 vjeç), por edhe lojtarë si Roho, Otamendi, Merkado e Facio, të cilët në Botërorin e ardhshëm do të jenë mes 32-34 vjeçëve dhe do të nevojiten për eksperiencë. Por në këtë repart talent ka me shumicë, duke nisur nga Fabricio Bustos i Indipendientes, Emanuel Mamana i Zenitit, German Pezela i Fiorentinës apo edhe Ramiro Funes Mori i Vijarelit. MESFUSHA - Mesfusha, difensive apo qoftë ofensive, është reparti ku klasi është i padiskutueshëm. Disa prej tyre si: Xho Lo Çelso, Maksi Meza, Kishan Pavon kanë debutuar, por ndoshta tani ka ardhur radha që juventini Paulo Dibala të marrë stafetën e titullarit, por pse jo edhe Leandro Paredes e Matias Kraneviter të Zenitit; ndoshta edhe Santiago Askaçibar i Shtutgartit, Riki Senturion i Rasingut apo edhe Rodrigo Batlja i Sportingut. SULMI - Aguero nuk tërhiqet, Mesi mbetet në dyshim, por ndoshta Higuain e të tjerë nuk vazhdojnë më. Prandaj, nga tani e në vazhdim ka ardhur ora e interistëve Mauro Ikardi e Lautaro Martinez, por emri që po mbahet nën vëzhgim është Lukas Alario, ylli i ri i Leverkusenit.