Dështimi në Botëror, ja pesë arsyet që u dënuan bardhekaltrit

Vërtet u eliminua që në grupe Gjermania, Spanja apo edhe Portugalia, por Argjentina shihej si një ndër favoritet kryesore për të ngritur në qiell Kupën e Botës dhe "vetëvrasjet" e mësipërme nuk e justifikojnë, përkundrazi e bëjnë edhe më të rëndë dështimin e tyre. Media nisi që në fazën e grupeve që t'i bënte gjyqin skuadrës, por pas eliminimit ka listuar pesë arsyet madhore të këtij dështimi.

1 - Më kryesorja dhe ndoshta ajo që u bëri më keq ishte fakti që edhe njëherë tjetër, Argjentina u mbështet tek individi dhe jo te grupi. Mesi, ndoshta edhe Di Maria dhe Aguero duhet të mbanin sërish peshën e të gjithë grupit, por në futboll luhet 11 kundër 11, ndryshe jo, edhe nëse në fushë ke një që quhet Mesi.

2 - Sampaoli... Çfarë të thuash... Faktet flasin vetë. Kimia mes trajnerit dhe lojtarëve mungonte, por pas humbjes 3-0 me Kroacinë, në sipërfaqe doli urrejtja. Aq sa lojtarët kërkuan "kokën" e tij, edhe pse në mes të turneut.

3 - Sërish Sampaoli, por këtë herë për zgjedhjet e tij taktike. Ndoshta figura e Mesit dhe Maskeranos e kanë detyruar që të mos vendosë gjithmonë me kokën e tij, por edhe fakti që në katër ndeshje ndryshoi tri herë skemë loje, kjo tregon çoroditjen e tij.

4 - Mesi, mbi të gjitha Mesi... Edhe një herë tjetër nuk luajti në nivelin e tij. Edhe Botërori i katërt do ta shohë kokulur, por këtë herë, ndryshe nga rastet e tjera, ai u duk sozia e tij e shëmtuar, pasi kurrë nuk tregoi dëshirë për të luajtur në fushë.

5 - Rrëmuja në Federatën Argjentinase gjithashtu ndikoi. Mes eliminatoreve të Botërorit dhe pjesëmarrjes në Rusi, u ndërruan dy presidentë federate dhe tre trajnerë. Dhe kaq mjafton që jo vetëm organizimi administrativ të mungonte, por ishte ky që ndoshta solli edhe çorientimin taktik dhe menaxhues të grupit të lojtarëve.