"Gjelat" kampionë bote në Rusi, "France Football" zgjidh dilemat
Franca mposhti Argjentinën dhe u kualifikua në çerekfinale, por pikëpyetjet rreth "Gjelave" vijojnë. Në një analizë të saj, "France Football" është munduar të zgjidhë dilemat që "torturojnë" Didie Deshampin, por edhe një pjesë të mirë të tifozërisë transalpine. Duhet të shqetësohet Franca për tre gola të pësuar ? Çerekfinalet nuk janë sinonim i perfeksionit francez. Reparti i tërhequr, por sidomos faza mbrojtëse e ekipit të Deshampit, pavarësisht emrave, ka pasur gjithnjë probleme performance. Mungesa e një mesfushori që të bllokojë Di Marian apo amnezitë e Pavarit si në golin e Agueros, janë një sinjal alarmi që kumbon prej kohësh. Edhe ndaj Australisë, sidomos pas golit të tyre, "Gjelat" vuajtën jo pak për të ruajtur rezultatin.
A ka Franca mesfushën më të mirë të Botërorit ?
Kante, Pogba e ndonjëherë Matuidi, Nzonzi apo Toliso përbëjnë atë që në mos më e mirë, është pa dyshim ndër mesfushat më cilësore në Rusi. Dyshja Pogba-Kante është në superformë, por a do të durojë dot deri në fund ritmin që imponon Kupa e Botës? Shanset janë të larta, por në një Bbotëror surprizash duhet të përgatitemi për gjithçka. A janë francezët favoritë, nëse Grizman gjen ritmin ideal ? Nëse Mbape fluturon, Grizman duket disi më i "tërhequr". Megjithëse është një garanci nga pika e bardhë, sulmuesi nuk po shfaq nivelet me të cilat na ka mësuar. Një "Grizu" i flaktë do t'i jepte Francës Kupën, por në pritje të tij mund të shijojmë Mbapenë...
A mund të thuhet se lideri i skuadrës është Kilië Mbape ? Me tre gola, shumë vrapime dhe po aq driblime me siguri është një udhëheqës në fushë. Për të qenë lider duhet edhe pak përvojë, megjithatë është në rrugën e duhur, pasi shokët shohin gjithnjë nga ai kur janë në vështirësi. Një Kupë Bote, pa dyshim do ta bënte të tillë. Kush duhet ta zëvendësojë të skualifikuarin Matuidi ndaj Uruguait?
Toliso, Nzonzi dhe Lemar janë kandidatët kryesorë, por nuk është çudi që Deshamp të propozojë një tjetër modul. Fitorja me Argjentinën dhuron siguri në aspektin e skemës, teksa edhe Dembele hyn në listën e zëvendësuesve të mesfushorit të Juventusit, në rast se 43-3-shi mbetet dogma e "Gjelave".