Hazard u gëzohet eliminimeve luksoze: Më mirë pa Mesin dhe Ronaldon
Trajneri i Belgjikës predikon përqendrim ndaj Japonisë
Belgjikën e pret sot një provë e lehtë në letër ndaj Japonisë. Samurajtë do të kërkojnë surprizën e radhës në këtë Botëror, teksa formacioni i Martinezit me Januzajn në dyshim, është në kërkim të biletës për në çerekfinale. Vetë trajneri i "Djajve" ka kërkuar vëmendje ndaj japonezëve, teksa në konferencë për shtyp ka sqaruar: "Japonia është një ekip me shumë energji, të aftë për t'u përballur me ne, të pajisur mirë teknikisht dhe shumë të shpejtë. Personalisht, i admiroj sepse luajnë me shumë përqendrim dhe disiplinë, ndaj nuk pres të jetë e lehtë ndaj tyre". Martinez i druhet motivimit nga ana e të tijve, teksa nuk nguron t'u kujtojë të tijve se ky është Botërori i surprizave. "Kemi një shans të mirë dhe nuk duhet të besojmë se kemi kaluar turin. Kjo është një ndeshje e Kampionatit Botëror dhe kurrë nuk i dihet se çfarë mund të ndodhë. Japonia fitoi ndeshjen e parë kundër Kolumbisë. Ata kanë lojtarë të kualifikuar që luajnë ose kanë luajtur në klubet e mëdha europiane". HAZARD GËZOHET - Botërori ka dhënë vendime të ashpra lidhur me yjet dhe ekipet e mëdha. Gjermania, Mesi dhe Ronaldo i kanë dhënë lamtumirë përpara kohe kompeticionit, teksa belgët nuk duan të jenë një tjetër viktimë e famshme në Rusi. Lidhur me këtë argument ka folur edhe Eden Hazard, i cili për të përditshmen spanjolle "Marca"
ka deklaruar: "Eliminimi i yjeve si Mesi apo Ronaldo është diçka e mirë për ne që synojmë të ecim sa më larg, por është një mëkat për ta. Dikush që e do futbollin, kërkon të shohë duele mes lojtarëve më të mirë, por ja që ne si futbollistë jemi në një garë me ta dhe duam që të largohen, sepse kështu shtohen mundësitë tona për trofeun.