Luftëtari drejt konsolidimit, ja dilemat e Kostiçit për formacionin
Gjirokastritët luajnë sot miqësoren e tretë ndaj Voluntari
Luftëtari, nën drejtimin e sllovenit Millosh Kostiç, vijon me intensitet përgatitjet verore, të vlefshme për prezantimin e parë në Ligën e Europës. Kundërshtari i gjirokastritëve dihet tashmë që nga data 20 qershor, Ventspils i Letonisë, ndaj së cilës do të synojnë kualifikimin. Trajneri Kostiç, duke shfrytëzuar kushtet optimale që ofron kampingu ku ndodhen në Slloveni, ka bërë që ekipi të zhvillojë edhe dy ndeshje miqësore. Në dy takimet e luajtura, përkatësisht me Rabotnickin e Maqedonisë dhe NK Aluminij të Sllovenisë, Luftëtari ka dalë fitues. 3- 1 me Rabotnickin dhe 2- 1 ndaj NK Aluminij, duke konfirmuar se gjërat janë duke shkuar mirë te bluzinjtë. Afrimet e merkatos së verës po ingranohen me pjesën e skuadrës së sezonit të fundit. Qëllimi i këtyre ndeshjeve miqësore për trajnerin Kostiç mbetet projektimi i formacionit, me të cilin Luftëtari do të zbresë në fushë ndaj Ventspilsit më 12 korrik.
Testet e kontrollit brenda familjes gjirokastrite, si dhe dy miqësoret e zhvilluara në Slloveni, kanë qenë në funksion të përcaktimit të formacionit për ballafaqimin e parë në Europë, betejë, të cilën e nisin më 12 korrik në Letoni. Gjithsesi, stafi teknik i ka ende disa enigma për të zgjidhur deri sa të përcaktojë formacionin ideal. Dilema e parë është porta, pasi si Bukovski edhe Ruci mbeten rivalë të denjë për një vend si titullar. Mbrojtja është reparti më i kompletuar i Luftëtarit, teksa në organikën e tij ka emra jo pak cilësorë. Vendin e kapitenit të larguar, Orjad Beqiri, e ka zënë një tjetër shtatlartë, boshnjaku Nemanja Janiçiç. Ndërsa pjesa tjetër e këtij sektori mbetet e pandryshuar. Shqetësim për trajnerin Kostiç është mosgatishmëria e Ivan Jakovljeviç, i cili vijon riaftësimin, megjithatë alternativat janë për një mbrojtje solide. Nëse Jakovljeviç nuk ia del, mbrojtja pritet të përbëhet nga Liçaj, Rrapa, Janiçiç dhe Xhekson. "Diga" Ramadani-Aleksi është siguria para prapavijës. Mesfusha e skuadrës gjirokastrite, padyshim reparti më i mirë i Luftëtarit në sezonin e fundit, është thuajse e pacenuar. Fantazisti Eduart Rroca vijon riaftësimin, por është afruar në merkato një i ngjashëm, Erjon Vucaj. Shkodrani shihet si zëvendësuesi i Rrocës në dy ndeshjet me Ventspils, i cili së bashku me Milosavljev në të djathtë dhe Bregut majtas, do të përbëjnë treshen që të do furnizojë Vasil Shkurtajn në majë të sulmit. Luftëtari, ashtu si dhe sezonin e fundit, do të mbështet te moduli taktik 4-2-3-1. Një modul ky që në përqindjen më të madhe të ndeshjeve ka rezultuar i duhuri.
MIQËSORJA E TRETË- Sot Luftëtari do të luajë ndeshjen e tretë miqësore me ekipin e Superligës rumune, Voluntarin. Para zhvendosjes në tokën sllovene, Luftëtari zhvilloi në Gjirokastër miqësoren e parë me Butrintin. 2-0 fitoi Luftëtari ndaj Butrintit, falë golave të dy të rinjve Oshafi dhe Andoni.