Dy të rinj për Kastriotin, një grek në provë
Kastrioti barazoi pa gola në miqësoren e parë për këtë sezon zhvilluar me ekipin e Laçit. Për krutanët nuk kishte shumë rëndësi rezultati i takimit, por më së shumti ky test miqësor i shërbeu stafit teknik për të parë lojtarët e ardhur në provë te krutanët. Dy ishin risitë, pasi takimin miqësor e nisën nga minuta e parë dy futbollistë të rinj. 21-vjeçari Fabio Hasa ishte njëri prej lojtarëve që e nisi si titullar miqësoren ndaj Laçit. Hasa është një mbrojtës që ka eksperiencë me disa skuadra edhe në Superiore, por nuk është se ka marrë shumë minutazh, për shkak se kur ishte pjesë e Partizanit ishte vetëm 17 vjeç, ndërsa te Teuta, në kohë më të vonshme është aktivizuar në disa takime. Sezonin e shkuar luajti me fanellën e Dinamos në Kategorinë e Parë në 21 ndeshje, duke arritur që të shënonte edhe një gol. Bruno Puja është vetëm 18 vjeç, një portier i formuar tek akademia Besa, por edhe pjesë e Kombëtares U-20. Ashtu si Hasa, edhe Puja e nisi titullar miqësoren me Laçin duke bërë paraqitje të mirë. Nuk dihet në këto futbollistë do të jenë pjesë e Kastriotit apo janë ende në provë, pasi klubi ende nuk ka bërë asgjë publike.
TË TJERËT - Në pjesën e dytë në fushë për krutanët zbritën edhe shumë futbollistë të tjerë, mes tyre Përgjini, Bala, por edhe mbrojtësi Theodoros Papoutsogiannopoulos. Një futbollist grek që vjet ka qenë pjesë e Slavia Sofia. Futbollisti 23-vjeçar ka provuar të luajë edhe në Superligë në Greqi, teksa ka qenë pjesë e Atromitos dhe Niki Volos. Ai ka provuar edhe një eksperiencë me Chania dhe më pas me Aiginiakos. Me këta të fundit ka luajtur rregullisht, duke u aktivizuar në 26 ndeshje. Sakaq, edhe Erlind Korreshi vazhdon të stërvitet me krutanët, por ashtu si pjesa tjetër e lojtarëve në provë, fillimisht duhet të bindin stafin teknik për t'u bërë pjesë e Kastriotit. Krutanët u rikthyen pas katër vitesh mungesë në Superiore dhe synojnë që të krijojnë një ekip të mirë që minimalisht t'i shpëtojë rënies në Kategorinë e Parë. Puna ka nisur me intensitet, ndërsa stafi teknik është i përkushtuar maksimalisht për të bërë më të mirën që të përzgjedhë lojtarët e nevojshëm për kampionatin e ardhshëm. Në sfidën e luajtur ndaj Laçit, duhet thënë se ekipi bëri një paraqitje të mirë ku edhe të rinjtë, dhanë sinjale pozitive për sa i përket vazhdimësisë. Bujar Balliu