Pazar në Afrikë, Tirana merr dy lojtarë të Ganës
Mbrojtësi firmos për 3 vite, mesfushori thuajse gati
Tirana nuk di të ndalet. Bardheblutë sigurojnë shërbimet e dy lojtarëve të huaj për këtë merkato vere. Ashtu sikundër pritej, vijnë nga Afrika e largët dhe konkretisht nga Gana. Bëhet fjalë për elementë që luajnë me kombëtaren e vendit të tyre dhe quhen Vinsent Atinga dhe Uinful Kobinah. Pas Blazhevskit dhe Imamit, vazhdojnë përforcimet për projektin "Superiore". Nëse Atinga është zyrtarizuar prej klubit, e njëjta gjë nuk mund të thuhet për mesfushorin. Ky i fundit në orët e ardhshme pritet që të mbyllë përfundimisht edhe detajet e fundit kontraktuale dhe vetëm kështu mund të marrë statusin si lojtari më i ri i kryeqytetasve.
ATINGA
Qendërmbrojtësi Vincent Atinga është blerja numër tre e bardhebluve. Ai ka nënshkruar për tre vitet e ardhshme, duke "blinduar" kësisoj repartin e prapavijës. Lojtari 24- vjeçar dallohet për shtatlartësinë, ndërsa është 1.90 metra i gjatë. Nga të dhënat që ofron rrjeti, zbulohet se ai ka luajtur 7 ndeshje me përfaqësuesen ganeze, ndërsa në karrierën e tij ka luajtur për ekipe si Ebusua Duarfs dhe Hart of Oak. Klubi njoftoi zyrtarisht marrëveshjen me këtë futbollist, ndërsa dje shkruante: "Është mbyllur sot ( dje) me sukses tratativa në Ganë për përforcimin numër tre për Tiranën Superiore. Vincent Atinga ka nënshkruar për 3 vite me bardheblutë. Drejtori Ekzekutiv, Hektor Çomo, ka firmosur në Akra Teodore me mbrojtësin 24vjeçar, që vjen si një përforcim me shumë vlera për sezonin e ri. Atinga është pjesë e Kombëtares së Ganës dhe një lojtar shumë i rëndësishëm për repartin difensiv dhe qendrën e mbrojtjes". Mësohet se mbrojtësi do të jetë nën urdhrat e Ze Marias shumë
shpejt, pasi drejtuesit kanë nxituar që të nisin procedurat jo vetëm për vizën, por edhe lejen e qëndrimit. KOBINAH
Blerja e katërt për Tiranën do të jetë Uniful Kobinah. Ai vjen si përforcim për qendrën e mesfushën,
ndërsa dallohet jo vetëm për aftësitë e tij në defensivë, por edhe ofensivë. Lojtari në fjalë vjen nga ekipi Hart of Oak, ekip ku ka luajtur edhe patrioti i tij dhe është 26 vjeç. Mesfushori numëron tri prezenca me përfaqësuesen ganeze dhe
gjithashtu do të firmosë një marrëveshje për tre vitet e ardhshme me klubin më të titulluar në Shqipëri. Megjithatë, duke qenë se kanë mbetur edhe disa detaje të fundit për të mbyllur, klubi e ka shtyrë për më vonë zyrtarizimin e tij.