Mbape dhe O'Ney kërcënojnë Mesin e Ronaldon

Botërori rus po thyhen çdo rregull futbollistik. Të mëdhatë po bien njëra pas tjetrës, teksa finalja pritet të jetë një premierë absolute. Me Mesin dhe Ronaldon që kanë kompromentuar rrugëtimet e tyre, "Topi i Artë" mund të ndryshojë pronar për herë të parë pas një dekade. Trashëgimtari - Prej vitesh, ai shihet si pasardhësi i "Pleshtit" dhe CR7-ës, por deri më sot Nejmar vetëm sa u është afruar dy mostrave të Barçës dhe Realit. Ndryshoi skuadër pikërisht për të cenuar hegjemoninë e tyre dhe, pasi dështoi këtë sezon me PSG, po mundohet t'u vjedhë kurorën pikërisht në një event prestigjioz si Botërori. Teksa Nejmar pas golit me Meksikën fërkon duart, kompanitë e basteve shohin Kutinjon mes favoritëve për "Topin e Artë". Sulmuesi, të cilin Interi e solli në Europë, ka një koeficient 8 për postin e më të mirit, teksa Nejmar vjen pak më pas me 12 koeficient. Në këtë aspekt, më mirë se dyshja braziliane, është Kilian Mbape, një fitore e të cilit e "Topit të Artë" paguhet 6-fish, shumë e vendosur. Sezoni i jashtëzakonshëm brenda kufirit francez mund ta penalizojë disi, por një triumf i "Gjelave" në Botëror mund të ishte një hap i madh drejt trofeut më të lakmuar individual për një futbollist niveli.

Kandidatë - Vjen disi më pas, por ndoshta pa të drejtë. Luka Modriç me një sukses të Kroacisë së tij mund të shndërrohet në "Topin e Artë" të ri. Ndryshe nga Mbape, mesfushori i Realit ka suksesin në Champions një kartëvizitë të përsosur për çmimin që çdo vit "France Football" ia jep futbollistit më të mirë. Pas kroatit, vijnë "madrilenët", Serxho Ramos dhe Isko, teksa dëmtimi ndaj Portugalisë mund të penalizojë Edinson Kavanin. Belgët Lukaku dhe Hazar varen nga kombëtarja e tyre, teksa të njëjtin problem ka edhe Herri Kejn. Kapiteni i Anglisë duhet patjetër të ngrejë Kupën e Botës, në mënyrë që të shpresojë që t'i rrëmbejë fronin Mesit apo Ronaldo.