Sauthgejt: Anglia, gati për gjithçka

"Kolumbinë e respektojmë, por kemi një shans të artë. Kam llogaritur edhe penalltitë"

Garet Sauthgejt e pret i qetë ndeshjen kundër Kolumbisë. Anglia, sipas trajnerit të saj, ka një shans të artë për t'i dhënë fund bilancit të tmerrshëm që ka në ndeshjet me eliminim direkt në Botëror dhe të arrijë fitoren e parë në një ndeshje të tillë që prej vitit 2006. Spanja konsiderohej rivalja më e fortë e "Tre Luanëve" në mes të shortit, por ata u eliminuan nga organizatorët e Rusisë. Rruga e ishullorëve drejt finales, nëse do të mundin Kolumbinë, do të jetë Zvicra ose Suedia në çerekfinale dhe pastaj një mes Kroacisë dhe Rusisë në gjysmëfinale. "Kemi 10 vite që nuk fitojmë një ndeshje me eliminim direkt. Ky është një shans i mrekullueshëm për të shkuar përtej fazës që kanë ngecur kombëtare me më shumë eksperiencë", tha Sauthgejt përpara ndeshjes së sotme, duke vlerësuar maksimalisht edhe kundërshtarin që do të ketë përballë: "Kolumbia është një skuadër shumë e fortë dhe e respektojmë. Duhet të ruajmë stilin dhe mentalitetin që kemi treguar deri tani në turne. Duhet të tregojmë rezistencë, por mbi të gjitha edhe liri në lojë. Do të jetë një mbrëmje fantastike". Ai nuk trembet nga faktori i tifozërisë, që pritet të jetë në favor të kolumbianëve: "Kam shkuar dy herë në ndeshjet e tyre në ' Brazil 2014'. Kishte një atmosferë karnavalesh dhe ne mezi po presim". Anglia nuk arrin në çerekfinalet e një turneu të rëndësishëm që prej Euro 2012, ku ata u eliminuan me penallti nga Italia, ashtu siç ka ndodhur edhe në dy çerekfinalet e mëpërparshme në Gjermani 2006 dhe Euro 2004 ( në të dyja rastet kundër Portugalisë). Ata janë eliminuar nga Itali 1990 dhe Euro 1996 sërish nga penalltitë (në të dyja rastet nga Gjermania). Sauthgejt, i cili humbi edhe penalltinë vendimtare në gjysmëfinalet e Euro 1996, beson se e ka stërvitur aq shumë skuadrën për këtë pjesë, sa nuk i trembet mallkimit: "Jemi përgatitur për këtë pikë. Dimë edhe radhën e ekzekutimit, por do të luhet shumë futboll përpara se të vijnë ato".