Zyrtarizon De Vraj e Azamoah, Inter: Për Ikardin asnjë ofertë
Administratori Antonelo qartëson situatën me kapitenin
Transferimi i tij ishte çështje e ditur prej kohësh, por dje ka ardhur zyrtarizimi: Stefan de Vraj është një lojtar i Interit. Qendërmbrojtësi holandez u mor me parametër zero pas skadencës së kontratës me Lacion. Sipas kontratës të konfirmuar nga klubi milanez, De Vraj do qëndrojë zikaltër deri më 30 qershor 2023. Pak orë më vonë, Interi zyrtarizoi edhe Azamoahn, kontrata e të cilit do skadojë më 30 qershor të 2021-shit.
IKARDI - Kohë afrimesh, por edhe dilemash tek Interi. Pas dy transferimeve që u zyrtarizuan dje, të cilave u bashkohen ato të Mateo Politanos, Raxha Naingolanit (pritet edhe ajo e Lautaro Martinez), mbetet për t'u përcaktuar e ardhmja e Mauro Ikardit, një lajm i shumëpritur nga tifozëria zikaltër. Një përcaktim është bërë nga administratori i deleguar i klubit, Alesandro Antonelo. "Oferta për IkardinW Deri më sot, asnjë - ka shpjeguar drejtuesi interist. - Mauro është kapiteni i Interit, ekziston një kontratë në fuqi dhe ka gatishmëri nga të dyja palët për të diskutuar
rinovimin, - tha Antonelo për mikrofonët e 'La Politica nel Pallone'. - Do takohemi në javët e ardhshme për të diskutuar dhe shpresojmë të arrihet kënaqësia e të dy palëve". Ikardi ndërkaq, pasi nuk u grumbullua nga kombëtarja argjentinase për Botërorin rus, po kalon
ditët e fundit të pushimeve së bashku me familjen e tij. Më 9 korrik do nisë në fakt grumbullimi zikaltër në qendrën stërvitore "Appiano Gentile". Nga data 1 deri më 15 korrik është e mundur, për klubet joitaliane, të derdhin 110 milionë eurot e klauzolës së lirimit.