Akord me Frashërin, ofertat dhe financat “hendek” për titullarët
Skënderbeu/ Konfirmohen Radas e Muzaka, tre janë të lëkundur
Në pritje të ditës kur do të fillojnë përgatitjet, me shumë interes është e ardhmja e lojtarëve që janë pa kontratë. Për momentin, bardhekuqtë kanë konfirmuar qëndrimin e Marko Radasit, i cili do të "gradohet" edhe kapiten i ekipit. Por, nuk është i vetmi, pasi në mesfushë mbetet edhe një Gjergji Muzaka. Me këta titullarë të zyrtarizuar, si edhe rikthimin e disa prej të huazuarve, mendohet që do të nisë punën skuadra për sezonin e ri. Sikundër edhe është thënë, më 5 korrik do të vihen nën urdhrat e Orges Shehit të rikthyerit nga Laçi e Flamurtari, Lulaj dhe Hoxhaj. Ajo që mundon më së shumti bardhekuqtë, është e ardhmja e lojtarëve që janë me kontratë të skaduar. Skënderbeu ka hyrë në bisedime me ta dhe ajo çka duket në pamje të parë është lëkundshmëria e tyre për të bërë një zgjedhje. Dhe këtu bëhet fjalë për Vangjelin e Micin, por edhe Osmanin. Dy të parët janë në kërkim të një aventure jashtë vendit dhe vetëm nëse nuk realizojnë këtë transferim, mund të shohin si opsion rikthimin në Korçë. Nga ana tjetër, Osmani, ndoshta edhe për shkaqe familjare, është i dyzuar, nëse do të vijojë me Skënderbeun apo do të zgjedhë një ekip afër kryeqytetit. Dhe një "strehë" për korçarin mund të jetë Teuta e drejtuar prej Bledi Shkëmbit. Është e dukshme që këta lojtarë presin edhe një garanci financiare prej Skënderbeut për të thënë "po". Vendimi sigurisht që i takon Ardjan Takajt. Nëse presidenti jep garanci në këtë drejtim, mund të ketë edhe ribashkim. Lojtarët përtej anës morale dhe afeksionit që kanë për fanellën, në këtë fazë po mendojnë edhe për "xhepat" e tyre. Zyrtarizimet - Me titullarët që janë më shumë larg se afër
ekipit, duhet thënë që Skënderbeu ende nuk ka gati as boshtin. Megjithatë, kjo nuk do t'i pengojë që të mendojnë për zyrtarizimet. Fill pas prezantimit të trajnerit Orges Shehi, do të nisin edhe negociatat për merkaton në hyrje. Dhe i pari në listë duket se është mbrojtësi i krahut, Erlis Frashërin, i cili do të rikthehet pas 8 vitesh në shtëpi. Korçari nuk ka refuzuar kërkesën e Skënderbeut dhe ka vendosur që të kthehet në vendlindje pas sezonit realisht pozitiv që bëri me Kamzën. Në këtë mënyrë, 30-vjeçari kthehet në shtëpi pas 8 viteve mungesë, ndërsa për të fundit herë pjesë e bardhekuqve ka qenë në sezonin 2008-2009. Llazi Saro