Guri dhe Abazaj magjepsin Belgjikën
Sindrit Guri bën “poker” dhe 2 asiste, Kristal Abazaj i shënon PSV-së për 60 sekonda
Sindrit Guri dhe Kristal Abazaj nuk kanë dashur të humbasin kohë dhe po ua bëjnë të ditur drejtuesve të skuadrave respektive në Belgjikë se për çfarë lloj talentesh i kanë shpenzuar paratë.
KATËR GOLA DHE DY ASISTE - Sindrit Guri duket se i ka bindur drejtuesit e klubit belg Ostende, se ata nuk i kanë shpenzuar kot 710 mijë eurot që paguan për shkodranin. Në miqësoren e ditës së djeshme, e fituar 14-0 përballë amatorëve të Bruse Bojs, Guri ka qenë në një formë të jashtëzakonshme, duke realizuar 4 gola dhe duke dhënë 2 asiste. Bomberi shqiptar është në ditët e tij të para me skuadrën belge, por duket se ambientimi nuk do të jetë aspak problem për qendërsulmuesin. Paraqitje të tilla në fazën përgatitore dhe ndeshjet miqësore janë një tregues i qartë i formës dhe ambicieve të tij për të lënë gjurmë tek Ostende. Fillimisht Guri shënoi me të djathtën i vetëm me portierin, më pas ktheu në gol një 11- metërsh. Realizimi i tretë erdhi nëpërmjet një goditjeje me kokë, ndërsa "pokerin" personal e mbylli me një devijim të lehtë me të majtën. Krahas katër golave, shqiptari asistoi dy herë në fitoren 14-0 ndaj skuadrës amatore të Bruse Bojs. GOL NDAJ PSV-së - Kristal Abazaj vazhdon të shkëlqejë. Ish-sulmuesi i Luftëtarit, i cili u transferua te skuadra belge e Anderlehtit, ka arritur të shndërrohet menjëherë në protagonist, duke gjetur rrugën e rrjetës në ndeshjen miqësore ndaj PSV-së, të fituar nga skuadra e shqiptarit me rezultatin 5- 3. Vetëm 1 minutë i ka mjaftuar futbollistit të Kombëtares që të gjente golin (minuta e 46-të), i tretë për skuadrën e Anderlehtit.