Kejn: Duam ta bëjmë Anglinë krenare
Dele Ali thirrje për të mos u ndalur, Fabian Delf zbulon sekretin çfarë po ndodh në ishull
Fitorja ndaj Suedisë shton entuziazmin në dhomat e zhveshjes së anglezëve. Sërish në gjysmëfinale pas 28 vitesh, falë suksesit 2-0 firmosur nga Meguajër dhe Dele Ali. Skuadra e Garet Sauthgejtit hedh hapur tashmë kandidaturën për të fituar Botërorin dhe ushqyer shpresat e tifozëve në atdhe, që e presin trofeun prej vitit 1966. Mes të parëve që folën pas vërshëllimës finale, ishte Dele Ali, një prej heronjve dhe autor i golit të dytë që "i preu këmbët" Suedisë. "Jemi të lumtur, sepse e dimë që kemi bërë një hap të rëndësishëm. Nuk mendoj se ishte ndeshja ime më e mirë, por jam shumë i kënaqur për rezultatin e arritur. Ishte një arritje e shkëlqyer për skuadrën dhe tifozët. Ata kanë besuar te ne. Pikford provoi që në ndeshjen ndaj Kolumbisë se sa i rëndësishëm është për këtë skuadër dhe tani do të festojmë së bashku. Imagjinojmë se çfarë po ndodh në këto momente në Angli. Duhet të vazhdojmë të besojmë".
Kejn - Këtyre fjalëve u bën jehonë edhe kapiteni Kejn, i cili këtë herë nuk shënoi, por mbetet golashënuesi i turneut me 6 gola në 4 ndeshje: "E dimë që kemi edhe një ndeshje të madhe përpara, por ndihemi optimistë. Duhet ta kalojmë edhe atë. Tifozët që janë këtu dhe ata në Angli po e shijojnë të gjithë këtë. Ne duam të bëjmë vendin krenar. Ishim fantastikë. Lëvizëm shpejt dhe jemi të kënaqur që e shënuam golin e parë me goditje standarde, sepse jemi stërvitur shumë për to. Por na u deshën edhe ndërhyrjet shpëtimtare të Pikfordit në pjesën e dytë".
Delf - Fabian Delf ka pasur shansin të rikthehet në shtëpi këtë javë, për shkak se priti fëmijën e tij të tretë dhe u ka treguar shokëve shumë sekrete për atë që po ndodh në Angli: "Është e vështirë ta përshkruash me fjalë. Ishte një javë e shkëlqyer. Falë trajnerit që më lejoi të shkoja në shtëpi, unë përjetova çmendurinë që ndodhte në Angli. U përpoqa t'ua shpjegoj shokëve. Këtu jemi si në një flluskë të izoluar. Edhe njerëzit që nuk kanë lidhje me futbollin më ndalonin në rrugë. Është fantastike që jemi në gjysmëfinale".