Super Hamilton, bën ligjin në shtëpi
Kampioni në fuqi triumfon në hiron e fundit, duke i lënë të gjithë pas vetes
Dita e djeshme ishte fantastike për sportin anglez, pasi përveç suksesit të kombëtares së luanëve, që prenë biletën për në gjysmëfinale të Kupës së Botës "Rusi 2018", një tjetër rezultat pozitiv erdhi nga "Formula 1" me Ljuis Hamilton, që fluturon në Sileverston dhe regjistron "pole position" në Çmimin e Madh të Anglisë. Piloti i Mercedes i mbyll provat e treta kualifikuese, duke shënuar kohën 1'25"892 dhe lë pas vetes me një diferencë fare të vogël Sebastian Fetel të Ferrarit (+ 0"044) dhe pilotin tjetër të "kokëkuqes" Kimi Raikonen (+ 0"098). Ndërkohë, vendi i katërt shkon për pilotin tjetër të Mercedes, Valteri Botas. Kështu, vija e parë e nisjes do të përbëhet nga Hamilton dhe Fetel, ndërsa vija e dytë nga Raikonen dhe Botas, duke na premtuar një luftë të zjarrtë ndërmjet Mercedes dhe Ferrarit. Vendi i pestë dhe i gjashtë shkon për dy makinat e Red Bull të Vershtapen dhe Riçardo. Ljuis Hamilton nuk fal në shtëpinë e tij dhe i gëzon fansat, duke regjistruar kohë më të mirë se të dyja makinat e Ferrarit, ku merr për herë të katërt radhazi "pole" në vendin e tij. Diferencën e bëri xhiroja e fundit, në të cilën britaniku u tregua thjesht perfekt, duke i marrë vendin e parë Fetelit, i cili nuk mundi të përmirësohet
në xhiron finale. Duket e çuditshme, por do të jetë vetëm hera e dytë për këtë sezon që Hamilton dhe Fetel nisen nga vija e parë së bashku. Hera e parë ishte në garën e zhvilluar në Baku dhe tashmë tifozët pritet të shijojnë spektaklin e garës me idhullin e tyre Hamilton,
i cili do të përpiqet të lërë pas zhgënjimin e garës së fundit, që u zhvillua në Austri. Kualifikueset e djeshme shkuan mirë edhe për Kimi Raikonen, që në ndryshim nga shoku i tij i skuadrës, kohën më të mirë e regjistroi pikërisht në xhiron e fundit, ku arriti t'i
marrë vendin bashkëkombësit të tij Valteri Botas. Ndërkohë, drejtuesit e Red Bull duhet të kënaqen me vijën e tretë të nisjes, pasi Vershtapen dhe Riçardo nuk mundën dot të mbanin ritmin e makinave Mercedes dhe Ferrari, madje diferenca me kreun ishte shumë e madhe, ku holandezi Vershtapen regjistroi kohën (+ 0" 710), ndërsa australiani Riçardo (+ 1"207). Gara do të startojë ditën e sotme në orën 15:10 dhe pritet të jetë shumë interesante, duke parë radhën e nisjes me dy pretendentët në krye.