Rinovimet, Kërçiku dhe Daja presin Halilin
Klubi insiston për Berishën, por në mes është... Vllaznia
orian Kërçiku dhe Asion Daja nuk mund të konsiderohen akoma bardheblu. Në ndryshim nga Hoxhallari dhe Ngoo, që u "blinduan" më shumë se një muaj përpara prej klubit, dy lojtarët e fundit të mbetur pa kontratë nuk janë zyrtarizuar ende. Që prej nisjes së këtij muaji kanë mbetur të lirë në treg (duke qenë se marrëveshja u ka "skaduar" më 30 qershor) dhe vetëm akordi parimor nuk mjafton për zyrtarizmin. Ishte lënë që rinovimet do të mbylleshin brenda kësaj jave, por deri dje as njëri dhe as tjetri nuk janë ulur me drejtuesit për të nënshkruar. Ndoshta, dita e sotme mund të rezervojë ndonjë zhvillim, megjithatë kjo duhet parë, në të kundërt mbetet e hëna. Gazeta kontaktoi me të dy lojtarët dje për t'i pyetur rreth rinovimeve dhe si mbrojtësi, ashtu edhe mesfushori, dolën në konkluzionin që janë në pritje të presidentit për formalitet e fundit. Duhet thënë që lojtarët kanë arritur akordin për të gjitha termat kontraktualë me klubin, përfshi jo vetëm kohëzgjatjen, por edhe pjesën financiare,
megjithatë që të konsiderohen bardheblu, fillimisht duhet që të firmosin. Si drejtuesit, ashtu edhe trajneri i kanë në plane, madje vetë Ze Maria ua ka bërë të qartë lojtarëve se i do në organikë për sezonin 2018- 2019. Megjithatë, që dëshira trepalëshe të përfundojë
me sukses, duhet që të hidhet firma mbi kontratë.
BERISHA - Në fillim konsiderohej vetëm si një emër i lakuar, megjithatë Vedat Berisha është zyrtarisht në planet e Tiranës. Bardheblutë e kanë ideuar shkupjanin si qendërmbrojtës. Megjithatë, mbyllja me sukses e këtij "operacioni" kalon nga Vllaznia. Lojtari është nën kontratë me shkodranët dhe në gjendjen që ky klub është pas rënies nga kategoria, nuk dihet asgjë rreth së ardhmes. Mungesa e një administratori krijon "hendek" të madh edhe për vetë Berishën, që nuk ka me kë të diskutojë për vijimësinë e bashkëpunimit. Pasi afruan Vincent Atingën, drejtuesit po insistojnë për një tjetër qendërmbrojtës. Ka shumë variante, mes tyre edhe kosovari Alban Selmanaj, megjithatë i duhuri për klubin është pikërisht Berisha.