Fetel bën kryevepër në Britani

Piloti gjerman thellon diferencën me rivalin britanik, finlandezi Raikonen renditet i treti

ebastian Fetel fiton Çmimin e Madh te Britanisë dhe thellon diferencën në krye të klasifikimit të "Formula 1". Falë një parakalimi kryevepër në fund të garës, gjermani i Ferrarit arrin të marrë një triumf në Silverstone duke lënë pas Mercedesin e Hamiltonit dhe shokun e tij të skuadrës Raikonen. Kështu Fetel mbyll në mënyrën më të mirë një garë të çmendur dhe shumë të luftuar duke e thelluar në +8 pikë diferencën në krye të renditjes, edhe pse britaniku rikuperoi shumë pozicione pas një fillimi të vështirë. Pa dyshim që gara e djeshme ishte më spektakolarja e gjithë sezonit, me të papritura që nuk mbaronin asnjëherë, me parakalime spektakolare dhe me një duel drithërues ndërmjet Ferrarit dhe Mercedesit që i emocionoi të gjithë deri në kthesën e fundit. Me pak fjalë, gara e Silverstonit i kishte të gjitha dhe në fund u shpërblye Sebastian Fetel, i cili tregoi një formë të shkëlqyer, ndonëse nuk ishte në gjendje të mirë shëndetësore që prej mëngjesit të ditës së shtunë. Sigurisht, për t'u vlerësuar ishte edhe paraqitja e Ljuis Hamiltonit, për të cilën gara nis në një mënyrë shumë të keqe me goditjen që mori nga Raikonen, por që kreu një numër të jashtëzakonshëm parakalimesh duke përfunduar nga vendi i fundit në podium, ku siguroi vendin e dytë. Si Fetel ashtu dhe Hamilton nxorën më të mirën nga repertori i tyre duke i lënë të gjithë fansat gojëhapur me paraqitjen fantastike që realizuan. Nisja e garës ishte shumë tronditëse dhe solli penalizimin për

Raikonen pas kontaktit me kampionin në fuqi. Ndërsa spektakli i vërtetë shpërtheu në fund të garës ku, menjëherë pasi u kryen "Pit-Stop"et, në pistë bëhen protagoniste makinat "Safety", fillimisht pas përplasjes së makinës Sauber të pilotit Erikson, e më pas incidentit të frikshëm ndërmjet Erikson dhe Groszho. Nga kjo situatë përfitojnë makinat Ferrari, të cilat shkojnë në "Box" për të montuar gomat e reja Soft, ndërkohë që Mercedes ndjek një tjetër strategji duke vazhduar me të njëjtat goma. Si rezultat i kësaj lëvizjeje kemi dhjetë

xhiro radhazi shumë emocionuese, me Fetel që realizon një parakalim ndaj kryesuesve të garës Botas dhe Hamilton, të cilët realizojnë një paraqitje spektakolare duke zënë vendin e dytë. Kështu Ferrari ndërpret dominimin e Mercedes në Angli që zgjaste që nga viti 2013 dhe tashmë konfirmon që i ka sheshuar diferencat me skuadrën anglo-gjermane.

Gara e djeshme ishte për t'u harruar për skuadrën e Red Bull, me Riçardon që e mbylli në vendin e pestë dhe me Vershatapen që e braktisi garën pak xhiro para fundit.