Tripier: Nuk ishte e thënë, faleminderit tifozëve!

Edhe Kieran Tripier bëri një Botëror të mrekullueshëm. Mbrojtësit të Totenhemit i vjen keq që ai supergol që në minutën e pestë nuk e ndihmoi skuadrën e Anglisë të bënte edhe hapin e fundit drejt finales. "Sigurisht që jemi të zhgënjyer, por jemi rritur si skuadër gjatë turneut dhe i përballuam mirë disa ndeshje, por edhe penalltitë. Të gjithë e dinë që duhet t'i shfrytëzosh shanset në një gjysmëfinale Botërori dhe nëse do ta kishim shënuar edhe golin e dytë, gjërat do të ishin ndryshe. Ne jemi shumë krenarë për veten dhe stafin që mbërritëm deri në këtë fazë. Nuk ishte e thënë, por duam të falënderojmë të gjithë tifozët tanë. Të gjithëve u jemi mirënjohës për sakrificat që kanë bërë".