Frymëzohet Alban Hoxha: Të përsërisim Ferencvaroshin

Alban Hoxha i konsideron "përralla" premtimet për kualifikim në Ligën e Europës ndaj Mariborit. Ai është me këmbë në tokë dhe premton se skuadra do të bëjë maksimumin në sfidën e sotme. Gjithashtu, ai kërkon edhe mbështetjen e tifozëve në këtë sfidë. Si është Partizani me Gegën në stërvitje, në skemat që aplikon dhe në aspekte të tjera? Çdo trajner ka mënyrën e vet të të punuarit. Kemi bërë një punë shumë të mirë dhe kjo është e vërtetë dhe jo për t'i bërë qejfin trajnerit që është këtu. Kemi punuar shumë fort dhe ekipi është e kënaqur me punën. Mendoj se jemi në rrugën e duhur. Kur të mbarojnë edhe ndeshjet e Kupave të Europës, trajneri do të ketë edhe më shumë kohë për të parë elementë të tjerë. Me grupin aktual është bërë një punë shumë e mirë dhe këtë do ta tregojë nesër (sot) fusha. Me sa vetëbesim do të luajë nesër (sot) Partizani ndaj Mariborit? Ne nuk mund të themi që do kualifikohemi apo përralla të tilla që thuhen përpara ndeshjeve. Ne duam të luajmë të gjithë futboll dhe të japim të gjithë maksimumin. E shoh që në skuadër ka optimizëm. Në kualifikimin ndaj Ferencvarosh dy vite më parë keni qenë ndër më të mirët në fushë. Besoni se edhe ndaj një tjetër emri të rëndësishëm si Maribori fati të jetë sërish me ju dhe të kaloni më tej? Ne shpresojmë shumë, pasi në futboll duhet edhe fat. Ajo është një ndeshje që ka kaluar. Sigurisht, gjërat e mira që kanë ndodhur i mendoj dhe shpresoj të bëjmë të njëjtën gjë. Janë dy skuadra të ndryshme, por dëshira është e madhe që të bëjmë sa më mirë. Nga informacionet e deritanishme, janë shitur vetëm 500 bileta, keni ndonjë mesazh për tifozërinë në prag të kësaj ndeshjeje? Shpresoj që tifozët të jenë sa më të shumtë në stadium për të na mbështetur. Mendoj se ka kohë deri nesër (sot) për të blerë biletat. Dihet tashmë që biletat blihen ditën e ndeshjes. Unë besoj dhe e di mirë që tifozët do të jenë të shumtë. Le ta mbushin plot stadiumin, pasi kemi shumë nevojë për mbështetjen e tyre. Kur u hodh shorti, si e pritët që do të përballeshit me Mariborin? Fatkeqësisht, për ekipet shqiptare nuk ka kundërshtarë të lehtë. Shpresonim që të ishte një skuadër edhe më e lehtë, por prandaj është short me gogla dhe i paparashikueshëm. Shpresoj që të bëjmë më të mirën. Do të tentojmë të përballemi si të barabartë. Sa e madhe është kjo ndeshje për ju, klubin, lojtarët dhe tifozët? Sigurisht, dihet që është një ndeshje shumë e madhe. Një herë në vit luhet në Kupat e Europës dhe duhet ta shfrytëzosh sa më mirë këtë mundësi. Është ndeshje e madhe për të gjithë ne. Tani që jeni sërish kapiten dhe rritet përgjegjësia për ju, çfarë synoni? Edhe më parë kam pasur përgjegjësi të madhe. Edhe kur nuk e kam pasur shiritin, kam pasur përgjegjësi. Megjithatë, do mundohem që t'u jap sa më shumë zemër çunave në fushë, pasi kjo është puna e kapitenit.