Gjyla: Shumica e lojtarëve do largohen, nuk e kalojnë klasën

Trajneri i Lushnjës, Ilir Gjyla, deklaron për gazetën "Panorama Sport", se nga 30 futbollistët që stërviten aktualisht te Lushnja, pjesa më e madhe e tyre do të largohen sepse nuk i përgjigjen nivelit që kërkon skuadra. "Është e vërtetë që kemi më se një javë që kemi filluar përgatitjet. Jo ndoshta në maksimum 100%, pasi kampionati do të fillojë pas dy muajsh. Ne kemi folur me përfaqësuesit e FSHF-së dhe kemi mësuar që kampionati fillon në 9 shtator. Kështu që, koha është e mjaftueshme. Na kanë ardhur gati 60% e skuadrës. Mendoj që edhe futbollistë të tjerë kanë për të ardhur. Ka mbetur siç e kemi thënë, një pjesë e futbollistëve që ishin sezonin e kaluar. Kanë ardhur futbollistë që kanë luajtur në Kategorinë e Parë apo në ekipe të tjera jashtë rrethit. Mendoj që 4-5 futbollistë nga këta do të jenë pranë Lushnjës. Bashkë me këta do t'i bashkohen grupit edhe disa futbollistë po prapë nga Lushnja, që nuk kanë ardhur deri tani. Mendoj që duhet të vijnë sa më shpejt këta futbollistë. Nuk kanë ardhur dhe nuk e di se për çfarë arsye, pasi e dinë shumë mirë që stërvitja ka filluar. Megjithatë, është e drejta e tyre të zgjedhin, por të paktën të na informojnë. Tani te Lushnja po stërviten më shumë se 30 lojtarë. Ne do të bëjmë nesër (sot) një ndeshje kontrolli. I kemi marrë ose do t'iu marrim këtyre futbollistëve të rinj numrat e telefonit. Për ndonjë që do të na duhet. Megjithatë, e them me bindje të plotë që 99% e këtyre nuk do të jenë pjesë e Lushnjës. Për të mos thënë 100%. Përpos atyre 2-3 futbollistëve që i kemi afruar, pjesa tjetër e të gjithë këtyre që kanë ardhur, nuk e kalojnë klasën. Megjithatë, do të bëjmë të premten një ndeshje kontrolli. Unë mendoj që nga një ekip të rinjsh, të marrësh 2-3 futbollistë, është një gjë shumë e mirë", u shpreh trajneri i Lushnjës në prononcimin e tij. Alban Alushi