Protestë për milionat e Ronaldos, anulohet prezantimi i CR7-ës
Punëtorët e shkarkuar të FIAT kërkojnë takim me “CR7”-ën
Ehëna duhej të ishte dita e madhe e Kristiano Ronaldos, e hëna do të jetë dita e madhe e Kristiano Ronaldos te Juventusi, por në orët e fundit, plani madhështor për prezantimin e fenomenit portugez përpara tifozërisë së tij të re ka ndryshuar. Nëse mëngjesin e djeshëm nga selia e klubit kampion Italie kishte dalë lajmi se "CR7" do të pritej në një mënyrë spektakolare në "Allianz Stadium", i programuar për në orën 21:00, duket se gjithçka ka ndryshuar, për faj të një tjetër kompanie në pronësi të Andrea Anjelit, presidentit të "Zonjës së Vjetër". Bëhet fjalë për punonjësit e konstruktorit automobilistik FIAT, të cilët nuk e kanë pritur aspak mirë ardhjen e Kristiano Ronaldos. Kuptohet që protesta e tyre nuk lidhet aspak me lojtarin, por me shifrat që janë shpenzuar nga miliarderi torinez për futbollistin: 377 milionë euro... SI PRITEJ CEREMONIA
Dita e hënë e Kristiano Ronaldos në Torino pritej që të ishte shumë e gjatë. Mbërritja e tij në aeroportin e qytetit dhe avionin privat ishte parashikuar për në orët e para të mëngjesit dhe nga aty do t'i drejtohej menjëherë qendrës mjekësore të klubit bardhezi, "J Medical", ku do t'u nënshtrohej vizitave mjekësore të plota. Më pas, Ronaldo do të vizitonte stadiumin, selinë e klubit dhe për disa minuta edhe qendrën stërvitore të bardhezinjve, për të takuar trajnerin dhe shokët e rinj të ekipit, ndërsa në mbrëmje, ishte programuar një festë madhështore në ambientet e "Allianz Stadiumit", në orën 21:00. Në këtë event historik priteshin 35-40 mijë tifozë, të cilët do të shijonin "live" konferencën zyrtare të Kristiano Ronaldos, të veshur me uniformën e Juventusit. Vetë klubi do ta shfrytëzonte këtë rast për të arkëtuar diçka rreth 1 milion euro, duke qenë se pjesëmarrja do të paguhej me biletat që varionin nga 5-15 euro, ndonëse tani nuk do të bëhet më asgjë, të paktën në stadium, sepse konferenca për shtyp e Ronaldos, do të mbahet në sallën e medias në "Allianz Stadium". PROTESTË ME PANKARTA
Kjo, sepse mbërritja e Kristiano Ronaldos në Torino mund të gëzojë sportdashësit dhe tifozët, por jo mesa duket punëtorët e thjeshtë të kompanisë FIAT-it, në pronësi të familjes Anjeli. Ata, që kur lajmi nisi të qarkullojë se marrëveshja mund të mbyllej, paralajmëruan grevë, në shenjë pakënaqësi
për faktin se në 10 vitet e fundit asnjë prej punëtorëve nuk kishte marrë asnjë euro rritje page. Madje, në disa raste ka pasur edhe shkarkime për të ulur kostot. Por me t'u bërë zyrtar lajmi i Ronaldos, filiali i FIAT-it në Melfi ka lajmëruara sindikatën se do të bëjë dy ditë
grevë, në shenjë proteste për faktin se për Ronaldon hidhen lumë milionat, ndërsa punëtorët shumëvjeçarë nuk marrin trajtimin e duhur. Por gjërat dje kanë shkuar edhe përtej. Në Melfi, dje, pesë ish-punëtorë të FIAT-it, të shkarkuar nga puna që në vitin 2014 dhe që më pas
e kishin humbur të drejtën e rikthimit në punë në Gjykatën e Kasacionit, kanë vendosur që të protestojnë vetë, të mbështetur edhe nga disa punëtorë aktualë të këtij filiali të FIAT-it. Ata kanë zbritur në rrugë dhe kanë ngjitur disa pankarta në muret e stabilimentit, ku përveç fotos së Ronaldos, shkruhej: "Ne jemi ata që të paguajmë. Nëse për Ronaldon hidhen 400 milionë, për ne punëtorët vetëm shkelma bo...". Madje, pesë punëtorët e shkarkuar kanë kërkuar që ta takojnë personalisht "CR7"-ën pasi të zbarkojë në Torino, për t'i nënvizuar se nuk e kanë personale me atë.