Spaleti thumbon Juven për Ronaldon: Më mjafton Perisiç
Klubi rikuperon 377 mln eurot nëse shet 8.6 milionë fanella
Kristiano Ronaldo te Juventusi për katër vite është një operacion prej 377 milionë eurosh, nga të cilat kujtojmë që 105 milionë shkuan për Realin e Madridit, 12 milionë euro FIFA- s si taksë, 20 milionë euro bonus menaxherit të portugezit, Zhorzh Mendez, ndërsa përveç 120 milionë eurove si pagë neto futbollistit për katër vitet e ardhshme, po 120 milionë euro Juventusit do i duhet t'ia derdhë shtetit italian për të mbuluar taksat e lojtarit dhe të shpenzimit të bërë prej tyre. Dhe pa dyshim që këto shifra tërbuan jo pak njerëz, punonjësit e kompanisë FIAT mbi të gjitha, që janë gjithashtu në pronësi të familjes Anjeli. Por nëse në shifra të thata në letër ky duket një investim i vështirë për t'u shlyer, ndonëse sponsorët dhe biletat duket se e garantojnë atë, një llogari të thjeshtë e ka bërë edhe uebsajti "Eurosport", i cili nënvizon se bardhezinjve do t'u mjaftonin të shisnin 8.7 milionë fanellë me emrin e Kristiano Ronaldos dhe do ta mbulonin të gjithë shpenzimin katërvjeçar prej 377 milionë eurosh.
LLOGARITË - Në dyqanet e licencuara të Juventusit dhe të "Adidas"- it kanë dy ditë që kanë dalë në shitje fanellat me 7-ën e Kristiano Ronaldos. Nëse bluza për fëmijë kushton 85 euro, ai për adoleshentë e të rritur kushton 145 euro. Nga marrëveshja që "Adidas" ka bërë me klubin bardhezi, këta të fundit përfitojnë 30 për qind të shumës së çdo fanelle të shitur. E thënë ndryshe, nëse një bluzë e Ronaldos kushton 145 euro, nga këto, 43.5 euro shkojnë direkt në arkat e klubit kampion Italie, ndërsa pjesa tjetër në ato të kompanisë "Adidas" (kujtojmë që gjermanët kanë një akord 6-vjeçar që prej vitit 2015, nga i cili Juventusi do të përfitojë 238.6 milionë dollarë). Prandaj, për të rikuperuar të gjithë shpenzimin 4-vjeçar prej 377 milionë eurosh, Kristiano Ronaldos i duhet që të shesë në të gjithë botën 8 milionë e 700 mijë fanella dhe Juventusi nuk ka pse të shqetësohet për bilancet. Dhe një objektiv i tillë duket lehtësisht i arritshëm, duke parë se vetëm në 48 orët e para, në dyqanet italiane dhe ato online janë shitur 520 mijë fanella, të cilat kanë sjellë 52 milionë euro të ardhura, të cilat do të ndahen mes Juves dhe "Adidas"-it.