Presidenti akuzohet për trukime
Nga problemet me Dacian në Moldavi te entspils, mediat franceze flasin për një histori të errët
Të gjithë flasin për golin e turpshëm që pësoi Luftëtari në kohën shtesë ndaj Ventspils, por mediat në Francë dhe Letoni janë fokusuar totalisht te presidenti i klubit letonez. Duke qenë se Ventspils do të luajë kundër Bordosë në turin e dytë të Ligës së Europës, mediat franceze i kanë bërë jehonë asaj që i pret. Ato janë marrë me të kaluarën e biznesmenit rus, Adlan Shishkhanov, që u bë president i klubit të Ventspils pak vite më parë. Pas vdekjes së ish- presidentit të ekipit letonez, Juri Bespallov, në vitin 2012, te Ventspils u afrua pikërisht rusi Shishkhanov. Sipas asaj që shkruan portali francez, "footballski.fr", tifozët në Letoni u shqetësuan menjëherë, pasi e kaluara e biznesmenit ishte e errët. Ai kishte
braktisur klubin moldav të Dacia Kishinjevit, ndërsa akuzohet për trukime ndeshjesh dhe pastrim parash. "Ai kishte probleme në Moldavi dhe nuk ishte më i mirëpritur atje. Ndaj filloi të kërkonte një klub të ri. Duke llogaritur se vende si Moldavia dhe Letonia kanë lidhje me të kaluarën sovjetike, nuk ishte çudi që një rus u shfaq te Ventspils", citohej në portalin francez, duke iu referuar gazetarit Ilja Polakovs, i cili ka investiguar për të kaluarën e presidentit rus në Letoni.
PROBLEMET - "Duke mësuar për të kaluarën e Shishkhanov, tifozët dhe Federata e Futbollit të Letonisë janë treguar të përmbajtur. Edhe sot e kësaj dite janë skeptikë për këtë afrim në futbollin letonez. Në pjesën më të madhe të rasteve, investitorët e huaj kanë ardhur në Letoni për të mashtruar dhe për të organizuar ndeshje të trukuara. Me mbërritjen e Shishkhanov te Ventspils, të paktën 10 lojtarë letonezë u lanë të lirë, duke u zëvendësuar nga katër që erdhën nga Dacia. Përveç lojtarëve, u ndryshua edhe stafi. Trajneri i portierëve u zëvendësua me Aleksandër Vlasov, një njeri i pezulluar në të kaluarën për ndeshje të trukuara. Presidenti është i lidhur me persona të shumtë në futbollin letonez që kanë një të kaluar në ndeshje të trukuara. Në fillim kishte zëra se do të merrte kampionët e Spartaks Jurmala, por pastaj zgjodhi Ventspils. Reputacioni i tij nuk është i mirë këtu. Gjatë periudhës në Moldavi, ai kishte lidhje me njerëz në Rusi, të cilët kanë një imazh negativ në futbollin letonez. Një prej tyre është Oleg Gavrilov, i cili është përjashtuar përjetësisht nga përfshirja në futboll në këtë vend, për shkak të ndeshjeve të trukuara me klubin e Daugavpils. Ne jemi gjithashtu të vetëdijshëm se këto ndeshje europiane janë ideale për t'u manipuluar në baste", shkruhej në portalin francez që përpara se Ventspils të luante me Luftëtarin.