Leonardo drejtor, pritet të sjellë Higuainin
Pasuri mbi dështime, ja kush e sjell në formë "Djallin"
Për 13 muaj fondi "El liot" u tregua i butë, por në momentin që situata u bë kritike, vendosi të merrte në dorë Milanin. Pas shumë kohësh durim dhe mbështetje, Pol Singer vendosi të shfaqej duke i treguar jo vetëm Jonghong Lisë, por të gjithë kuqezinjve se cili është themeluesi i fondit amerikan. Nëse manjati kinez bëri gjithçka për t'u diskretituar, anën e errët të hënës tashmë e njeh edhe Marko Fasone, i cili u likuidua brenda 30 minutash (aq zgjati procesi i shkarkimeve në Asamblenë e fundit). Fondi "Elliot" nuk u themelua nga milanistë, por aftësitë investuese janë jashtë çdo diskutimi, ashtu si soliditeti dhe financat. Objektivi parësor i amerikanëve te Milani, do të jetë barazimi i bilanceve në respekt të "Fairplay Financiar" duke shtuar burimet dhe fitimet. Rindërtimi i një skuadre maksimalisht konkurse është një tjetër synim i "Elliot" që i ka vendosur vetes. Pak rëndësi ka nëse kjo bëhet për dashuri apo për interes, Milani duhet shndërruar në një biznes të sigurt dhe të vlefshëm për momentin kur do të vendosin ta rishesin përsëri.Për ata që nuk e njohin, e përditshmja italiane "La Stampa" ka shpjeguar në pesë pika se cili është Pol Singer, njeriu që zotëron fondin "Elliot" dhe Milanin.
1.PASURIA- Disponueshmëria ekonomike e fondit multistrategjik amerikan është 30 miliardë euro. Shuma në fjalë i përket "Elliot"-it që e menaxhon për investime, teksa numri i investuesve që veprojnë me ta, zgjerohet sa herë familja Singer vendos të zgjerojë rrethin e veprimtarisë. Pol Singer, psikologu i diplomuar si jurist në 1977-ën, themeloi fondin me vetëm 1 milion dollarë. Sot pasuria e tij vetjake arrin në 2.8 miliardë.
2.INVESTIME- Fondi "Elliot" ka interes për situata krize apo menaxhime të dobëta në sipërmarrjet e mëdha. Në këtë aspekt, amerikanët kanë një kurrikulum të gjerë me kompani si Telecom, Hyundai, Adeko dhe Samsung. Pol Singer nuk ndalet as kur përballë
ka kombe, duke investuar në borxhet e shteteve. Argjentinë, Peru, madje deri në Kongo. I tillë është interesi i fondit që menaxhon Milanin. Strategjia është e rrezikshme, por jo e nxituar, të paktën jo kur quhesh Singer dhe ke në dispozicion avokatët më të mirë në
rang global.
3.GJYQE- Çështjet gjyqësore janë në rendin e ditës në fondin "Elliot" dhe jo të gjitha përfundojnë shpejt, siç ndodhi me kuqezinjtë në KAS. Ka raste kur zgjasin me vite, 15 në procesin kundër qeverisë argjentinase, e cila pas shumë
betejash ligjore u detyrua t'u paguante amerikanëve plot 2.4 miliardë euro, për rastin e bujshëm të bonove të privatizimit të lëshuara nga Buenos Airesi zyrtar. Raste të tjera të njohura janë ato kundër kolosëve të "Hitachi" ose largimi i francezëve të "Vivend"-it nga
menaxhimi i Telekomit italian, me të dy betejat që përfunduan në favor të "Elliot".
4.PRONARËT- "Elliot" i përket familjes Singer, e cila ka një pasuri të gjurmueshme dhe me famë ndërkombëtare. Nëse ka ndonjë dyshim në martesën mes Milanit dhe fondit
amerikan, është në lidhje me aspektin sportiv. Ky nuk është terreni i preferuar i Pol Singer, por të paktën si ai ashtu edhe i biri, Gordon, e njohin futbollin dhe janë tifozë të Arsenalit.
5.SHANS- Aventura kuqezi është një rast për "Elliot" që të tregojë se nuk është vetëm një fond spekulativ. Plani i tyre trevjeçar ka si qëllim rimëkëmbjen financiar, ku lajtmotiv do të jetë rivlerësimi ekonomik i klubit kuqezi. Politika të ashpra marketingu, sponsorizime dhe sidomos investime, me Singer që duket si profili ideal që mund të rikthejë në formë "Djallin".