Bregu, Skënderbeu bën rezistencë
Letonezët e Ventspils ofrojnë 150 mijë € dhe 30 % të kartonit, por Takaj nuk joshet
Dejvi Bregu u pre zantua dje nga klubi i Skënderbeut, teksa zhvilloi edhe stërvitjen e parë me fanellën bardhekuqe, por duket se deri më 31 gusht gjithçka do të jetë e hapur për vlonjatin. "Panorama Sport" zbulon ekskluzivisht se në zyrat e klubit korçar ka mbërritur një ofertë zyrtare për blerjen e ish-mesfushorit të Luftëtarit. Surprizë për vetë drejtuesit ka qenë emri i klubit, teksa bëhet fjalë për Ventspils, ekipin që eliminoi gjirokastritët nga turi i parë në Ligën e Europës. Letonezët kishin përgatitur terrenin që përpara se Luftëtari të luante ndeshjen e parë. Mirëpo, me kalimin e ditëve u futën në negociata me drejtuesit e Skënderbeut dhe bënë ofertë zyrtare. Mësohet se Ventspils ofroi 150 mijë euro për blerjen, ndërsa pranonte që 30 % e kartonit të mbetej në pronësi të Skënderbeut. Mirëpo, në Korçë duket se bëjnë plane të tjera dhe nuk kënaqen me pak. Lajmin e konfirmon vetë presidenti Ardjan Takaj, enkas për gazetën. "Po, është e vërtetë që ka ardhur një ofertë nga Ventspils, por e refuzuam. Bregu është një investim i rëndësishëm, por si për të, ashtu edhe të gjithë lojtarët, çdo gjë mbetet e hapur", theksoi Takaj. PREZANTIMI
Në daljen e parë publike pas ardhjes në Korçë, Bregu nuk i ka fshehur emocionet, teksa e cilësoi Skënderbeun si klubin më të mirë shqiptar. Goditja më e madhe e korçarëve deri më tani në merkato theksoi se ndihet i lumtur që do të luajë për korçarët, pa menduar nëse do të transferohet në një klub jashtë Shqipërisë gjatë merkatos.
Dejvi, pritje e gjatë për të veshur fanellën e Skënderbeut...
Mesa duket është pak vonë, por me këtë mikpritje ia vlejti. Nuk e kisha menduar se do të më prisnin me kaq dashuri në Korçë, por duket që Skënderbeu është një klub i madh dhe serioz.
Çfarë ju bindi të firmosnit
për Skënderbeun që në janar të këtij viti?
Duke parë që është klubi më i madh në Shqipëri, nuk ka nevojë të mendohesh dy herë. Meqenëse unë kam firmosur që në janar 2018, është e vonuar kjo mbërritja ime në Korçë. Gjithsesi, më mirë
vonë se kurrë...
Në momentin e vendimit të KAS- it, e rimenduat zgjedhjen që bëtë?
Jo, nuk e kam rimenduar në asnjë moment. Skënderbeu është një emër i madh dhe mendoj se lënia jashtë Europës ishte e padrejtë.
A mund t'ia dilni të bëni liderin në sulmin e Skënderbeut, në kohën kur të gjithë titullarët e këtij reparti janë larguar?
Po, përderisa klubi ka besuar tek aftësitë e mia, do të jap maksimumin dhe besoj se do ia dal. Gjithsesi, Skënderbeu ka kualitet në fazën e sulmit dhe besoj se klubi do të kryejë dhe afrime të tjera, që mund të na ndihmojnë gjatë kampionatit.
Federimi me Skënderbeun tani është një pamundësi për t'u shitur në janar. Ju shqetëson kjo?
Jam shumë i qetë dhe aspak i shqetësuar, sepse kjo çështje i takon klubit dhe menaxherit tim.
Si ju duket ky ekip, mendoni se mund garojë për titullin kampion?
Skënderbeu është ekipi më i mirë në Shqipëri. Objektivi primar mbetet titulli kampion dhe ky fakt nuk ka nevojë fare për diskutime.
Keni një premtim për tifozët?
Tifozëve iu premtoj jo 100%, por 200% nga vetja ime. Nuk ka nevojë për motiv, pasi një klub si Skënderbeu të vetëmotivon. Dejvi është gati për këtë sfidë.