Cungu: Presioni tek azerët, i godasim në Baku
“Pres ndonjë lojtar që mund të na shtonte cilësinë”
Armando Cungu është i kënaqur me mënyrën sesi skuadra e interpretoi lojën. Ai beson se barazimi 0-0 i jep shpresë Kukësit për një kualifikim të mundshëm. Në konferencën për shtyp pas ndeshjes, trajneri shkodran i dërgoi një sinjal klubit edhe sa i përket merkatos, teksa pret ndonjë lojtar që mund të bëjë diferencën.
E vendosët ekipin në atë mënyrë që, minimalisht të mos pësonit. Jeni i kënaqur nga barazimi 0-0?
I kuptoj dëshirat e njerëzve, por edhe mundësitë që ne si skuadër kemi. U munduam të shpreheshim me këtë mënyrë loje, por jam i bindur që nëse do të kishim pak më shumë qetësi, do t'i godisnim përmes kundërsulmeve, sidomos në pjesën e parë. Gjithsesi, unë dua të komplimentoj djemtë për ekzekutimin e lojës. Kanë punuar mjaft mirë taktikisht dhe gjithçka shkoi ashtu siç e kishim parashikuar. Mos të harrojmë se kemi përballë një kundërshtar të fortë dhe me kualitete. Kjo që bëmë sot ( dje) mendoj se ishte zgjedhja e duhur.
A mund të bënit më shumë ndaj këtij Karabaku?
Skuadra u përgjigj ashtu siç unë e përgatita gjithë javën. Mund të kishim shfrytëzuar më mirë kundërsulmin dhe goditjet standarde, por rëndësi ka që nuk pësuam. I kishim mundësitë për ta goditur Karabakun, por pashë një farë ngutjeje te lojtarët në finalizimin e aksioneve. Edhe kjo është e kuptueshme, sepse presioni nuk është i vogël, pavarësisht dëshirës që mund të kemi për të fituar ndeshjen. Jam i kënaqur me skuadrën në përgjithësi. Ishte një ndeshje e mirë, duke pasur parasysh kundërshtarin. Nuk donim të na kapte në befasi Karabak.
Kishim menduar këtë skemë, sepse Karabak ka shumë kualitet. Jam i bindur që nëse vendoseshim ndryshe, mund të pësonim më shumë se një gol. Duhet të ishim të kujdesshëm, mos të linim hapësira. Na mungoi vetëm qetësia në aspektin sulmues.
Sa shanse ka Kukësi që të kalojë azerët?
Është shumë e vështirë, por nuk i dihet. Do të shkojmë në Baku të sakrifikojmë, të bëjmë lojën tonë. Shpresoj që Rexhinaldo, i cili ka ardhur në ditët e fundit, të jetë një vlerë më tepër dhe ta ndihmojë skuadrën në momente të caktuara. Do të mundohemi të shfrytëzojmë hapësirat që do të lërë Karabak. Duhet të kemi qetësinë e duhur
për ta bërë diçka të tillë. Presioni është te Karabak, jo te ne. Këtë gjë duhet ta dinë edhe djemtë. Ne shkojmë për të luajtur futboll, pse jo të marrim barazim me gola apo fitore. Nuk të ndalon njeri të provosh, ta tentosh. Gjithçka mund të ndodhë. Absolutisht, nuk duhet të humbim shpresat, sepse skuadra po përmirësohet gradualisht.
Prisni ndonjë goditje të fundit nga merkato?
Po, pres sërish ndonjë lojtar, që mund të na përmirësojë më tepër dhe të jemi më kompetivë. Kjo do të na bënte mirë, sepse edhe nëse eliminohemi, sërish do të luajmë në Ligën e Europës dhe njëkohësisht duhet të mendojmë edhe për kampionatin. Duhet të jemi gati.