Kamza, ofertë zyrtare Teqjes për të blinduar mbrojtjen
Ish-lojtari i Shkëndijës aktualisht është i lirë
Kamza po vazhdon përgatitjet për sezonin e ri futbollistik nën drejtimin e trajnerit Bledar Devolli, ndërkohë që drejtuesit vazhdojnë të jenë në merkato për të përforcuar organikën me lojtarë cilësorë. Një nga repartet që po shihet me përparësi është edhe ai i mbrojtjes, ku emri më i fundit që ka dalë në skenë është ai i ishmbrojtësit të Tiranës dhe Shkëndijës, Olsi Teqjes. Ky i fundit ka marrë një ofertë konkrete nga drejtuesit e klubit kryeqytetas dhe është ulur në bisedime me ta, por ende nuk ka kthyer një përgjigje përfundimtare, nëse do të pranojë të firmosë kontratën për sezonin e ri. Me Teqjen kamzalinjtë do të mbyllnin përfundimisht qendrën e mbrojtjes, ku kanë mbyllur marrëveshjen me ish-kapitenin e Luftëtarit, Orjad Beqirin si dhe me Çukoviç. Kështu që trajneri Devolli po pret edhe përgjigjen e Teqjes, i cili ka eksperiencë në Superiore dhe do të ishte një siguri më shumë për prapavijën. Por, për lojtarin janë interesuar edhe disa klube të tjera në Superiore dhe kjo ka bërë që ai të vlerësojë ofertat për të vendosur më pas. Gjithsesi, shanset janë të mëdha që Teqja të pranojë ofertën e kamzalinjve, që do të kenë objektiv edhe sezonin e ardhshëm mbijetesën në Superiore, të cilën e siguruan kampionatin e shkuar. Drejtuesit kamzalinj kanë arritur të ruajnë bazën e lojtarëve të sezonit të shkuar dhe janë plotësuar në ato reparte ku ka pasur largime, siç kanë qenë mbrojtja dhe mesfusha, pozicione që janë zëvendësuar me lojtarë të ardhur nga merkato. Abdulla Dushku