Spaleti: Ekipi gati fizikisht, më pëlqeu dyshja e sulmit
Dy barazime radhazi në miqësoret e zhvilluara në këtë fazë përgatitore nuk e shqetësojnë aspak trajnerin e Interit, Luçiano Spaletin. Madje, ky i fundit e ka parë pozitivisht ndeshjen 1-1 kundër Shefild Junajtid, pasi thotë se ata janë shumë më të avancuar në përgatitje. "Ishte një ndeshje shumë e mirë, sepse ata janë në kushte shumë të mira fizike. Por ne u përgjigjëm njëlloj ndaj kësaj skuadre që luftonte për çdo top. Në këtë ndeshje bëmë edhe ndryshime në anën taktike dhe lojtarët u treguan të gatshëm për t'u qëndruar besnikë detyrave. Donim të mbanim të njëjtat detyra në fushën e lojës, edhe pse Lautaro nuk ka karakteristikat e një trekuartisti. Më pëlqeu shumë dhe loja e tij ishte e shkëlqyer, duke bërë vertikalizime të zgjuara për të mbështetur Mauro Ikardin. Të dy bashkë mendoj se bënë gjëra të mira dhe janë lojtarë shumë inteligjentë. Mund të bashkëjetojnë mirë me njëri-tjetrin në repartin e avancuar", tha fillimisht trajneri, duke vlerësuar dy argjentinasit.
ÇELSI- Ditën e shtunë, Interi do të përballet me Çelsin e Mauricio Sarrit dhe Spaleti thotë se do ta takojë me kënaqësi ishtrajnerin e Napolit. "Nuk kam folur me të gjatë kësaj kohe që ka marrë drejtimin e Çelsit, por do ta takoj me kënaqësi. Vitin e kaluar skuadra e tij bëri futbollin më të bukur në kampionatin italian dhe tani duhet të tregojë vlerat që ka në një nga kampionatet më të bukur në botë", vazhdoi më tej numri një i zikaltërve. Ai foli edhe për atmosferën në stadium kundër Shefildit dhe tha se u bën mirë lojtarëve. "Më pëlqeu më shumë kondicioni fizik i lojtarëve, që duket se është mirë dhe ata do të jenë gati për pak javë. Por edhe shumë aksione ishin interesante dhe japin besim për të ardhmen", përfundoi trajneri 59-vjeçar. Zikaltrit kanë luajtur deri tani 4 ndeshje miqësore dhe kanë marrë 1 fitore me Luganon, 1 humbje me Sionin dhe dy barazime me Zenitin dhe Shefildin.